!!اللى يخاف....ينزل كمه
اسمك إيه يابنى؟
اسمى وليد يا دكتور
عندك كام سنة يا وليد؟
18 يا بيه
بتشتغل إيه يا وليد؟
خراط
طيب بص يابنى......الجرح محتاج يتخيط
خيط يا بيه
:-و بينما كنت مستغرقا فى عمل الغرز رجانى مستعطفا
باقولك إيه يا دكتور....عندى طلب
قول يا وليد
ممكن الغرز ماتكونش باينة قوى
ليه يا وليد؟
عشان ممكن ياخدونى يا دكتور و يفتكرونى سوابق و لا حاجة
همة مين دول يا وليد؟
الحكومة يا بيه
منهم لنفسهم كدة يا وليد؟
يا بيه انت ما تعرفش عملوا فية إيه قبل كدة
إحكى يا وليد
كنت يا بيه مرة من شهر كدة ماشى فى الأزبكية باجيب طلبات للشغل و جالى أمين شرطة و سألنى على البطاقة و انا ماكنتش لسة عملتها .....و لما قلتله مامعاييش راح مجرجرنى على القسم،و هناك البيه الظابط شتمنى بأمى شتيمة وسخة و نزل فيا ضرب هوة و اللى معاه و فين يوجعك لحد أما عنيا ورمت و بعدها خلونى أمسح بلاط القسم كله أربع ادوار،وخدوا كل فلوسى يا دكتور ....ال150 جنيه كلهم بتوع الشغل و الله العظيم،و فى الاخر خالص رمونى برة القسم
ماعرفتش أعمل إيه يا دكتور ماكانش معايا فلوس أروح بيها على حلوان...نزلت المترو و رحت ناطط من فوق المكن على الرصيف عدل.....و عملت كدة فى محطة التحرير و حلوان.....و لولا ان الراجل صاحب الشغل كان ابن حلال و استعوض ربنا فى فلوسه،أنا ماعرفش كان إيه اللى حايحصللى!،خلاص يا بيه....أروح؟
روح يا وليد
طب و الغرزة يا بيه؟....دى باينة قوى
إبقى نزل كمك يا وليد
طيب يا دكتور،شكرا جدا....مع السلامة
مع السلامة يا وليد
!!!!ما عرفش ليه كنت عايز أقول لوليد آسف.....بس اتكسفت
صدق حبيب العادلى لما قال
اللى يخاف مايتكلمش
:-نصيحة
!اللى يخاف.....ينزل كمه
posted by هراءات منطقية @ ٧:٤٩ م
22 comments
22 Comments:
mawkef mo3aber fe3lan 7'of el bany adam el basit min batsh wy 3'oshm el solta
antouk
تعرف نفسي مرة واحده نقول لأ
نفسي نعرف نتكلم طيب اللي عمل في وليد ظابط طب لما يعمل كده حتة أمين شرطه لاراح ولاجه تقول ايه أمين ابن...ولا بلاش متعودتش أشتم حد بس نفسي أقول لأ
نفسي نقول لأ
البلوج بتاعك جميل على فكرة
مبروك
الموقف عادي مش جديد
بس الحكمة شديدة بجد
اللي يخاف ينزل كمه" ... فعلا"
ياريت تحولها لدعوة جماعية وشعار للأيام السودة الحالية
:)
ممكن نقول اللي يخاف ينزل كمه
او ما ينزلش الشارع من اساسه
او ما يقومش من السرير بتاعه
او ما يشيلش الغطا من عليه
علي فكرة فيه مخبر موجود مع كل واحد مصري في الشارع و في البيت وجنبه علي السرير وتحت الغطا
اوعي تتحرك المكان كله محاصر
اللى يخاف ميسمعش ولا يشوف اى حاجة فى البلد دى
بوست حلو
و ممكن اللى بيخاف ينتحر من باب الضمان
أزهى عصور إنارة المؤخرات
أزهى عصور مخبرى البنطلونات
أزهى عصور الشعب فى خدمة الشرطة
ازهى عصور 15 جندى مركزى لكل متظاهر
تقولى إزاى؟ أقولك معرفش
أزهى عصور ...و لا أقولك بلاش
كفاية كده
الاهلى رفع شعار اللى خايف يروح
الحكومة رفعت شعار ما دام
الامن مستتب فلا مشاكل مهو الشعب كلة
فى خدمة الحكومة والشرطة
لانها هى اللى بتقمع المظاهرات وبتطلب التجديد للطوارىء والخ
والنبى ياعم خللى زكايب الهم مربوطة
فكرتنى بزمان
كنت فى مدرسه ثانوى
كنا بنخاف كل يوم نروح
عشان البوكس كان بيجى كل يوم يلم شويه طلبه من اللى خارجين عشان يكملوا عدد المحاضر المطلوب منهم فى القسم
الظريف ان المخبرين كانوا بينزلوا يقفشوا فى الطلبه زى الفراخ
وكانوا بينقوا الطلبه اللى شكلهم فقير او من الارياف
يعنى مالهمش ضهر ولا مؤاخذه
لا حول ولا قوة
انا مكنتش متصور ان الوضع سئ للدرجة دى
ايه ياعم انت نزلت كمك وبطلت تكتب؟
مستنيين
الزملاء الأعزاء.....أعتذر بشدة عن تأخرى فى كتابة الردود طوال المدة السابقة لظروف خاصة
أنتوك
يسعدنى مرورك
غادة
منورة الأول
!بلد غريبة فعلا...تعمل مظاهرات ضخمة على العراق و فلسطين و رسوم الدانمارك،لكن لما حتة أمين شرطة يعمل أضعاف اللى اتعمل فى وليد ينخرسوا.....و ينزلوا كمهم من سكات
فهرنهايت(المختفى)
طب والله فكرة....نخليها مثلا(شمر كمك يا أخى......فقد مضى عهد الاستعباد).....و آه يا بلد
محمد يوسف
القانون الوحيد اللى ماشى فى البلد دى هوة قانون الطوارئ
هوميروس
الحكومة نجحت إنها تخللى فى مخ كل واحد مخبر و اتنين أمناء شرطة يخللوه بدل ما يمشى جنب الحيط...يمشى جوة الحيط!
محمد ياسر
!اللى يخاف مايعيشى فى البلد دى أساسا
دوك
دة بس اللى احا شايفينه و المستخبى ألعن
السهروردى
:)لأ كفاية أحسن
كلام
!فكرتنى لما بابقى معدى بالليل خالص جنب قسم المعادى و بالاقى ناس كثير قاعدين و فارشين جنب القسم.....فى الآخر عرفت إنهم قاعدين عشان ولادهم ممسوكين تحرى لأن البيه الضابط مايقدرش يقفل ورديته من غير مايكون قبض على عدد محدد من الشباب يملا بيهم دفتره
أسد محبوس
حلوة زكايب الهم دى.....بس حتتقطعوا يوم الاحد انشاءالله
هوميروس(مرة تانية)
:(أنا دلوقتى لابس نص كم....ماتخافش
العدلى بيطوح؛ واللى خايف يروح
بس على فكره انا ماقلتش حاجه
يا عم حتى لو نزلت كمك مش ممكن تغطى قفاك مش فارقه مع المخبرين حاجه حتى لو قفزت ولبست العفريته وغطيت دماغك بالطاقيه واللاسه ساعتها هيقطعولك هدومك. اقولك اوعى تغطى مخك
مادام خفنا و نازلنا الكم توقعوا يحصل فينا اكتر من كده
استغفر الله العظيم
يعنى واحد معهوش بطاقه يحصل فيه كل ده!!!
ليــــه!!!
بوست جميل جدا و محبط لاقصى حد!
كمانجة
آه يا جبااااان....لحقت تنزل كمك؟
:)
شيريو
على رأى الاسطى ستامونى.....القفا بيشوف كتير اليومين دول
مانورة
أهلا بيكى....المشكلة مش فى البطاقة،ممكن من غير بطاقة الواحد يتمسك عشان مربى دقنه أو بيصلى فى الجامع أو حتى عشان شكله مش عاجب البيه الضابط....حيتمسك حيتمسك
منورة تانى
جميلة جدا جدا
انا اعجبت بالمقالة دي لما قرأتها في الدستور
وسعيدة جدا اني قدرت أوصل لمدونة صاحبها
بالتوفيق ان شاء الله
أنا اللى سعيد بإنك قريتيها فى الجورنان قبل المدونة،و سعيد أكثر برأيك فيها وبتعليقك....بس يا ريت مايكونش آخر واحد يا دعاء
روحك حلوة جدا
شكرا جدا على رأيك و يا ريت أكون كدة
أهلا بيكى يا سلاف و بأهل تونس
زى الفل
ربنا يخلصنا منهم كلهم يا محمد
و ترجع البلد لأصحابها
يا ريت يا هشام و الله
!!!!أدينا مستنيين
اللي يخاف ينزل كمه
ولو مش عاوز هانربيه ونربي امه
ولو مش فاهم احنا هانعرف اللي يهمه
يا شعب غجر مالوش كبير
عملكوا ايه بس التفكير
احنا ممكن نمشي وراكل واحد فيكم عسكري اوحتى غفير
فكل واحديرحم نفسه ويبطل يجيب الشتيمة لامة ويا ولاد البلغ كل واحد ينزل كمه
أمضاء
(وزارة الملابس الداخلية )
قسم الاعلام والتلاحم الجماهيري
إرسال تعليق
<< Home