الثلاثاء، يونيو 06، 2006

خلاص ....سماح المرة دى

على غير العادة لن أعرب عن غيظى بسبب تمرير حبيبى و أبو زمل فهرنهايت تاجا آخر لى فى أقل من عشرة أيام.....حيث أنى بقالى أسبوع بأعانى من حالة جفاف فكرى شديد،و هبوط حاد فى وظائف غدة الكتابة

(مش عارف ليه يا محمد لما باجى أكتب بابقى زى اللى عايز يتف و ريقه ناشف!!!!)

جملة أثيرة لواحد صاحبى،مقرفة .....لكنها تفى بالغرض

المهم،نخش فى المفيد...............توكلنا على الله

افتح أقرب كتاب اليك , على الصفحة 18 , سطر 4

الفكر الفلسفى فكر ناقد يطرح فى المقام الأول قضية الجذور فى أية مشكلة حتى يمكن الكشف عن الوهم الكامن فى هذه الجذور
حد فاهم حاجة؟؟؟؟
من كتاب جرثومة التخلف لمراد وهبة(بالتاء المربوطة مش باللام)..............كل واحد يخللى باله من جذوره يا جماعة

مد ذراعك اليسرى قدر ماتستطيع

لأ

ما اّخر ماشاهدته على التلفزيون
(الصراع الميتافيزيقى بين عباس الضو و سلامة فراويلة فى المسلسل الأسطورى(المال و البنون

بدون أن تسترق النظر , تكهن كم الساعة

8.48 مساء


والاّن ..كم الساعة فعلا

إلا عشرة.....مارحناش بعيد قوى

باستثناء صوت الكمبيوتر .. أي صوت تسمع؟

صوتى و انا باتاوب

متى خرجت من المنزل للمرة الأخيرة ؟ ماذا كنت تفعل؟

كان امبارح عندى نباتشية 24 ساعة و طلعت منها الصبح الساعة 8 على القصر العينى أستشير دكتورة فى موضوع النيابات الاستثنائية و فى السكة عديت عالواد منعم المزين حلقلى راسى نمرة واحد و روحت

قبل مباشرتك هذه الأسئلة أي موقع كنت تتصفح؟

مدونتى حفار القبور و غادة الكاميليا

ماذا ترتدي الاّن؟

(أخضر و بأستك من فوق (قلت أتقل النهاردة

هل حلمت ليلة أمس؟

آخر مرة حلمت بإنى ماشى فى شارع طلعت حرب بالليل خالص و الدنيا ضلمة أنا و واحد صاحبى،و فجأة لقينا قردة بتهرش(غالبا جربانة) ساندة على عمود نور بتسأل صاحبى:انت مرتبط؟
حلم غريب شوية الصراحة

متى اّخر مرة ضحكت؟

لسة النهاردة قبل مانام،كنت باكلم الواد وائل على تليفون الصيدلية اللى شغال فيها ،فلقيته مش عارف صوتى....قلت أستعبطه
آلو
آلو
سلامو عليكم
و عليكم السلام
عندك فياجرا
أيوة
طب ادينى فياجرا
(ليه حضرتك؟(الصراحة استغبيت السؤال
عايز أوقف حواجبى

ثم انخرطت فى ضحك هستيرى

معلهش و الله لو كنت قليل الأدب بس هية دى فعلا آخر مرة ضحكت فيها


ماذا فوق جدران الغرفة حيث تجلس؟

(السقف (سؤال غريب فعلا

هل لاحظت شيئا غريبا مؤخرا؟

آه
كل أما آجى أبص على واحدة ماشية فى الشارع ألاقى الأذان بيأذن......مش عارف يعنى هية جت عليا أنا

مارأيك في هذا الاختبار؟

لطيف

مااّخر فيلم شاهدته؟

كنا قاعدين على القهوة و قلت للواد شافعى و هوة بيشيش: ماتيجى ياد نروح فيلم
V for Vendetta،فأخد نفس عميييييييييييييق و قال بحكمة متأملا أنفاسه المبعثرة فى الفضاء:-

حد يروح فيلم اسمه فنفنفنفتا؟

!!!!!عشان كدة يا جماعة آخر فيلم شفته كان فيلم فنفنفنفتا

اذا أصبحت فاحش الثراء فماذا تشتري؟

مممم,حاقسمهم تلات انصاص(ماتقوليش تيجى ازاى بس أكيد حاقدر بفلوسى.....مانا بقيت فاحش بقى).....النص الأولانى حاشترى بيه سندوتشات بطاطس طحينة بس من غير سلطة،و النص التانى حاشترى بيه الواد محمود محمود لتدعيم خط دفاع الأهلى،و النص التالت حاشترى بيه عربية 128 أحط فيها تكييف.......و اعيش بقى!!!

أخبرني شيئا أجهله عنك

جوايا زى برايا

اذا كان بامكانك تغيير شيء واحد في العالم بغض النظر عن المعاصي والسياسة فماذا تختار؟

مممم
نفسى الناس تبطل تف فى الشارع
نفسى يخللوا التحضير فى الجلدية بعد سنة
نفسى ماشوفش واد ماشى مدلدللى بنطلونه عشان يفرجنى جمال البوكسر بتاع أهله
نفسى ينقلوا المستشفى بتاعتى جنب سريرى
نفسى نظام البلوج فى الكتابة يتعدل و مالاقيش علامة التعجب فى أول الجملة

لو كان وليدك الأول فتاة فماذا تسميها؟

إسراء

لو كان وليدك الأول صبيا فماذا تسميه؟

حنظلة

هل تفكر يوما في العيش بالخارج؟

ماقدرش.....بحب البلد بنت الكلب دى قوىىىىى

ماذا تتصور أن يقول لك الله عندما تقف بين يديه ؟

مش عارف.....نفسى أعدى
أعدى بس

أربعة أشخاص تمرر لهم الدور

(حفار القبور (غلاسة بقى.....يللا جاوب تانى
(تمر حنة(اللى عاملة بلوج حلو قوى بس كل أما اجى اكتب تعليق فيه ألاقى النور قطع

مانورة

Placebo

Still Breathing

أما أعزائى الجمال جدا غادة و هوميروس و بعدك على بالى فاتمررلهم السؤال قبل كدة على ما أظن

معلهش يا جماعة،أنا عارف ان اتنين تاج ورا بعض شئ ممل....إنما أمر الله و نفد



ياللا.....إياكش تولع

25 Comments:

At 9:40 ص, Blogger Mohamed Mehrez said...

والله انت دمك زي العسل :)

احلى حاجة عجبتني في الحاجات اللي نفسك تغيرها
"نفسى نظام البلوج فى الكتابة يتعدل و مالاقيش علامة التعجب فى أول الجملة"
بس هي اسمها "نفسي نظام الكتابة في البلوج "
مش نظام البلوج في الكتابة :P
ويا ريت جات على علامة التعجب، ده انا هتجنن عشان اكتب بوست مش ملزق في بعضه، كل ما اخلص فقرة و ابدأ من اول السطر، الاقي البوست ظاهر بردو ملزق في بعضه.
حاجة تفقع

أما موضوع الفياجرا ده ففكرني بمرة كنت داخل الصيدلة قريب بشتري دوا، واللي كان واقف شاب بيستظرف، كان ليا باقي فلوس، بيقولي طيب معكش نص جنيه وتاخد 5 جنيه، قلت له لا للأسف.
قعد يستخف دم أهله ويقولي ازاي تيجي الصيدلية من غير فكة، قلت له ولا تزعل نفسك هاتلي بالباقي فياجرا فرط.
ما هو الظريف فيه اللي اظرف منه برضه

 
At 4:39 م, Blogger Pianist said...

حلو فشخ اللي انت بتقوله ده

 
At 12:57 ص, Blogger بعدك على بالى said...

والله يادكتورررر انت دمك زى السكر والعسل والمربى وكل الحاجات الحلوة،، انا قربت كلامك وضحكت جدااااااااااا، والله من زمااااان مضحكتش كده.. حلوة قوى المستشفى جنب السرير دى، ولا اللى بيدلدلوا بنطلوناتهم ،،، انا وريتها لابنى لانى ساعات بضبطه بيعمل كده ويقولى اصل البنطلون واسع..
بصاحه كل كلامك جميل، وشكرا على الدعوة بصراحه كان نفسى انا اللى امرر لك التاج بس الجايات اكتر من الريحات...
ملحوظه: تصدق انى فعلا كنت محتارة اكتب ايه زيك وجه اخونا العزيز فهرنهايت وانقذنى زيك...
مرة تانيه انت جميل يادكتور واكيد روحك الجميلة دى حتخليك تعدى بتفوق قدام ربنا... ماتقلقش...

 
At 3:39 م, Blogger still breathing said...

أول مرة حد يعملي تاج!!! ابقي تعالي كده بص علي البلوج الجديد بتاعي... المرة دي بالعربي

 
At 6:14 م, Anonymous Epitaph said...

hahahahahahhah

begad ana de7kt gamed gedan..
ma3 eny kont arfana tol el youm wana bazaker..bas la2eit el tag el gamed dah!

7anzalah?????? :)))))

fakrtny be 3adel emam fi el wad sayed el sha3'al we howa bey2ol lel ma2zoun " lakd da7'l dynon jadeed"

Best wishes

 
At 11:12 م, Blogger still breathing said...

7anzala msh w7esh bs el nas mesh mateebo fi 7alo!!

fa hay3od yed3li 3leek.. enta 7or!!

 
At 4:58 ص, Blogger غادة الكاميليا said...

أخبرني شيئا أجهله عنك

جوايا زى برايا
فعلا ده واضح يا دكتور بجد
بس جد الجد انت شخصيه روعه
كلامك التلقائي ده بيخليني أستمتع بالقراءه في البلوج بتاعك جدا

 
At 5:55 ص, Blogger تمر حنه said...

العزيز أبو حنظلة : أما بعد
نفس الضحك الهيستسرى اللى انتابنى فى موضوع الحواجب اجابة هايلة صحيح يعنى هى الحواجب مالهاش نفس !!!ا
لأ استنى هو صاحبك ده يعنى بيشتغل ايه فى الأرزخانه دى؟ أصل عايز فياجرا و ليه حضرتك ماتطلعش من حنك أى حد
(الا لو عايز يلاغيك تيك كير) - القصد - بيعجبنى فيك الفشخرة - لأ صحيح 128 بتكييف يا راجل؟؟ ماكفاية توك توك مانت صحيح أغتنيت و افتريت
و بيقولوا ان الموضه الصيف ده مبقتش المنطلون الساقط اللى بيكشف عن لون البوكسر و المفاجأه الكبيرة أن الموضة بقت البوكسر شخصيا بدون المنطلون و ياحبذا لو كان بفتة بدكه (مش أخضر و بأستك من فوق)
أستمتعت بكل حرف قريته و ألحق خش البلوج بتاعى قبل النور ماينقطع - مستنية أشوفك هناك
تشرب شاى؟

 
At 12:01 م, Blogger hesham said...

ايه يا معلم الدماغ العالية دى
مالكش حل و الله
و بعدين ايه رايك فى فنفنفنفتا
جامد مش كده؟

 
At 6:58 م, Blogger هوميروس said...

مساء الخير فلتكن اجاباتك التلقائية وعدم التكلف كافيين لاعرف عنك الكثير
كنت عايز استعير شخصيتك الافتراضية في ماتش بين مدونينا الحلوين توافق ياغالي؟

 
At 3:19 ص, Blogger أوزوريس يتحدى ست said...

على فكره أنا متفق معاك فى موضوع البنطلون اللى مدلدل ومبين البوكسر ؛دا حتى البوكسر مظر مايسرش
وموضوع أنك كل ماتبص على واحده الأذان يأذن دى بقى مسألة نيه وإظاهر يعنى إن نيتك .......ولا هتزعل عوما باى مؤقتا
ست

 
At 3:26 ص, Blogger أوزوريس يتحدى ست said...

بالنسبة لموضوع نقل المستشفى جنب السرير فأحب اطمئن سيادتك ان المباحثات على وشك الانتهاء لانشاء مستشفى من منازلهم حيث يذهب المريض للطبيب في المنزل (توفيرا للنفقات ) و بإذن الله سوف تفتتح قريبا في جزيرة الواق واق
ملحوظة: أرجو ألا تنتحر عندما يصلك التاج المرسل من قبلي
ولك تحياتي
أوزوريس

 
At 11:15 ص, Blogger kalam said...

هههههه والله انت عسل
وكويس ان حد لاحظ زيى ان المال والبنون مسلسل خيال علمى

الحوار بتاعه ينقط
بس غصب عنى كنت باشوفه كل يوم وانا باتغدى
والا
"طلقنى"

 
At 3:43 م, Blogger manora said...

اااه
هو احنا مش بناخد منكم غير تاجات بس
اهىء اهىء
انا ورايا تلات تاجات لسه معملتهمش يا بشر
اهىء اهىء

 
At 10:08 م, Blogger إياكش تولع said...

محمد محرز

منور يا باشا....حلوة قوى حكاية السجاير الفرط دى


بيانيست

You are welcome

ستل بريذنج

ماله اسم حنظلة،دة حتة سنتيمنتال
مبروك البلوج الجديد(ظريف جدا)


بعدك على بالى

و الله إنتى اللى سكر،سلميلى بس عالواد و خلليه يذاكر
يا ريت والله أعدى....انشالله بملحق!!!


etaph

أخبار المذاكرة إيه؟
شكرا على المرور



غادة الكاميليا

و الله دة شئ يسعدنى جدا ان البلوج يعجبك،و ياريت استاهل الكلام الحلو دة كله




تمر حنة

طب ما إيه رأيك....بلاها البنطلون و بلاها البوكسر
أما بخصوص الواد صاحبى دة فكويس انك وخدتينى بالى منه.....الواد شكله مايطمنش،كان عايزنى أزوره فى بيته عشان مامته عيانة


هشام
أهلا بيك يا باشا
أنا شخصيا باعتبر فنفنفتا أحد الأفلام اللى فيها خطاب سياسى يتفهم للمشاهد العادى عكس أفلام يوسف شاهين اللى محتاجة كتالوج عشان تفك الإسقاطات اللى فيها

هوميروس

يا باشا استعير براحتك....بس والله مانا فاهم حاجة بخصوص المتش دة

أوزوريس

يا باشا نورت البلوج،و الدعوة مقبولة انشاءالله



كلام
أهلا بيك يا باشا
أغرب ما المسلسل دة هو وجود اتفاق غير مكتوب بين جميع القنوات (من أول دريم لحد قناة الدلتا!!!)على ألا يخلو يوم واحد من حلقة للمسلسل.......حاجة كدة زى اللى كانوا بيعملوه مع ذئاب الجبل


مانورة

خلاص يا ستى....مش ممررلك حاجة تانى،بس ناتى عدى بس
:)

 
At 1:01 م, Blogger still breathing said...

انا حطيت صورة ليك علي السايد بار عندي تحت اللينك بتاع بلوجك.. ابقي بص عليها
:)

 
At 4:03 م, Blogger إياكش تولع said...

!!!!يا ساتر يا ولاء

ليه الفضايح دى؟

!!!!أنا كاتب إياكش تولع,مش إياكش أولع

 
At 2:54 ص, Blogger Nouran said...

ممكن اسال سؤال ؟؟

هو مين محمود محمود ده وهتشتريه ليه للاهلي ادام انت زملكاوي؟؟

 
At 7:23 م, Blogger إياكش تولع said...

أهلا يا نوران


هوة انا لو ماكنتش زملكاوى ماكنتش
قلت كدة؟

محمود محمود دة هوة أحد الرزايا و المصائب اللى ابتلى بيها ربنا نادى الزمالك

محمود محمود هو المسمار الأول و الأخير فى نعش أى فريق ينضم إليه

محمود محمود هوة اللى محتاجه النادى الاهلى عشان ينزل درجة ثانية

7:20 م

 
At 6:23 ص, Blogger المزاجنجي said...

دكترة انت عسل والله بس هل انت كده مع مرضاك وياريت تكون كده لاني كل ما تيجي لي ازمة القلب اعملي مشكلة وزيطة مع دكتور او اتنين من بتوع استقبال معهدالقلب لاني مريض من سنة 90 يعني قبل ما يدخلوا ثانوية عامة وعارف علاجي وهو الهيبراين والترايديل فمش لازم حالات العقم والنقص وتقعد تسئل فاهلي لاني بقولك على المفيد على طول لكن تقول ايه لازم يبقوا دكاترة وبسئلوا اسئلة رزلة ويضيعوا الوقت ويخنقوني والذي منه طيب اقولك على موقف حصلي مرة في المعهد وكانت ليله كحلي ولاول مرة يشدوا عى سريري ستارة واسمعلك كارديك اريست (يعني تقف بالقلب لغير المتخصصين ) وجري وتخبيط وفجأة لفوه بالملاية وشوفوا مبن معاه بره ويادوب مفيش نص ساعه وبرضى اريست ونفس اللي حصل ملاية وفين اهله ده وكده نفهم انه موت فانا ناديت على ممرضة من اللي في الاستقبال وسئلتها هو الدور عندكم ماشي يمين ولا شمال فيتقولي ليه فقلت لها لو يمين يبقى خير لو شمال اقوم احسن وانفد بجلدي وسلم لي على وزارة الكحة ههههههههههههه

 
At 3:33 م, Blogger dr hatem el bitar said...

تسلم ايدك حبيبي موقع جميل
وتستحق التقدير
واتمني لك مستقبل باهر ومزيد من التقدم
ياريت نكون اصحاب منتظر ايميلك وبناء جسور الصداقة بينا
ويا ريت تشوف موقعي وتقوللي رايك
www.timo1.jeeran.com/timo/
www.hatom1.jeeran.com/bitar/
http://coolman0120c.jeeran.com/timo.html
http://www.enashir.com/blogs/timo/
وانا اقبل بتبادل الاعلانــــــــــات
وارجو ان تنشروا مواقعي بموقعكم الجميل
mboile: 002-010-5684344
للتفاوض بخصوص الاعلانات ارجو اضافتي على المسنجر
timo_dentist1@yahoo.com
والايميل التالي
sambo200437@yahoo.com
my foto
http://www.realpics.net/user_photos/37801/22_492364.jpg

 
At 6:38 م, Anonymous محمد عادل said...

رائع ما شاء الله..

بس انا كنت نفسي اضيف حضرتك عندي على الماسنجر.. و معرفش الماسنجر بتاعك .. انا اصلي جديد في عالم التدوين و اتمنى اني ابني شبكة معارف لا بأس بها .. i could use anu help you can offer .. و ربنا يكرمك

blacktiger226@hotmail.com

 
At 8:36 ص, Anonymous غير معرف said...

Excellent, love it! 1996 bmw catalitic convertor fishers certified financial advisor Ground pcm auto manual trans jeep Covercraft car covers bad side effects of depakote er savannah personal injury lawyer Auto anti theft alarms Prom pants girl b depakote b b ec b treatment studies of bipolar 1 disorder with depakote Digital camera preview Best veterinary pain relief Debt tramadol What is b xanax b depakote and mellaril how to refinance jenna jameson fucking movie

 
At 8:54 م, Anonymous غير معرف said...

Warm welcome to Alnemat TheGrace Arabic Christian Internet Magazine, We love you! Please visit us at:

http://www.TheGrace.net

http://www.TheGrace.org
http://www.TheGrace.com
نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور أفضل من الظلمة
سلام لكم في محبة الله.نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات
Bible in Arabic Audio Read search Studys Stories Testimonies Hymns and Poems Answers Books Links Daily devotions Acappella Music Graphics /Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L'Evangile de Jésus Christ gratuit, Bienvenue a La Grâce.
Arabic Christian Magazine The Grace offering the Arabic Bible النعمة تقدم الإنجيل الكتاب المقدس

 
At 4:41 م, Blogger mariam said...

:)

 

إرسال تعليق

Links to this post:

إنشاء رابط

<< Home