الأربعاء، يونيو 14، 2006

متظاهر حسب الطلب



بسم الله الرحمن الرحيم
(و قل اعملوا فسيرى الله عملكم و رسوله و المؤمنون)


إيمانا من وزارة الداخلية بقيمة التظاهر و أهمية المشاركة السياسية، قامت وزارة الداخلية على لسان ممثلها فى الصحف القومية السيد (كرم جبر) بوضع مجموعة من النصائح تيسيرا على المواطنين و لرفع درجة الأمان التظاهراتى و الوعى الانتخابى

-:أولا:عزيزى المتظاهر

إذا كنت ترغب فى التظاهر فلا تختر مناطق ميدان التحرير أو نقابة الصحفيين أو منطقة وسط البلد عموما و ذلك تفاديا للاختناقات المرورية و تعطيل مصالح البلاد و العباد،حيث أن هذا الحق مقصور فقط على مواكب الرئيس و حرمه و نجليه(حفظهم الله) و السادة الوزراء و المحافظين و ضباط الأمن،و على هذا فبإمكانك التوجه إلى الأماكن المحددة سلفا من قبل وزارة الداخلية مثل الكيلو 107 طريق مصر السويس،أو على طريق الصعيد بعد استراحة نفرتيتى

-:ثانيا:عزيزى المعتقل

إذا تم اعتقالك بدون وجه حق و تم تعذيبك و هتك عرضك بورقة كرتون و تدليك خصيتك اليسرى (, باستمتاع شديد يا عزيزى) فلا تبعث بألفاظ تخدش الحياء العام من قبيل مؤخرة أو خصية (قدر أمك ولا أختك قروها يا أخى!) ، فهناك من تحمر وجوههم خجلا من اللفظ قبل الفعل،و هناك من لا يؤذى مشاعرهم هتك عرض مواطن قدر قراءة كلمة (مؤخرة) فى صحيفة،و على هذا فللحفاظ على الأخلاقيات العامة لا مانع من التعبير بعبارات محترمة لا تكشف و لا تشف من نوعية (حط البتاعة فى البتاع) أو (إدانى السقط فى الحساس)...و هكذا

-:ثالثا:عزيزى الصحفى

بادر باستخراج كارنيه النقابة و التحق بأقرب جريدة حكومية حتى لا تصبح أحد أولاد الشوارع الذين ينامون على الرصيف و تحت كبارى الصحف القومية،و الذين ينتمون إلى صحافة (لم تترك شيئا إلا لطخته ولم تترك رمزا إلا أهانته، ولا سقف عندها ولا ميثاق شرف ولا مبادئ ولا ضمير، وصحفيوها الذين اغتصبوا لقب صحفى يستخدمون أقلامهم بنفس طريقة استخدام المطاوى والسواطير، ليس لهم ماض ولن يكون لهم حاضر ولا مستقبل).....و اتخذ من ابراهيم نافع قدوة فى الحفاظ على المال العام،و من السيد سمير رجب نموذجا للخلق الصحفى و عفة اللسان(راجع مقاله المحترم عقب محاولة اغتيال عبدالعزيز مخيون) وفقك الله و سدد خطاك

-:رابعا:عزيزى الرأى العام


لا يوجد ضباط ساديون،لا يوجد ضباط يعتدون على الصحفيات فى الشارع،لا يوجد ضابط يأمر فرق الكاراتيه بسحل المتظاهرين،لا يوجد ضابط يختطف صحفية ليعتدى عليها و يضربها و يمزق ملابسها (فى قسم للشرطة!!)،لا يوجد ضابط يدخل ورقة كرتون فى مؤخرة معتقل....لا يوجد شئ من هذا مطلقا
تذكر يا أخ رأى....الضابط هو الذى يسهر على حمايتك،الضابط هو أخوك و أبوك و حموك
(و لا تنسى (نحن خدااااامك،لا حكااااااامك...........الكلام دة قدااااااااامك

-:خامسا:عزيزتى الناشطة

إذا تم سحلك و خطفك و تمزيق ملابسك و رميك فى الشارع.....ثم لم يأت القانون بحقك،فنحن نحذرك من محاولة اللجوء إلى المحاكم الدولية حيث أن اللجوء إلى الخارج و لحس عتباته و استجداء معوناته هو حق أصيل للحكومة فقط لا ينازعها فيه أحد،و على هذا فمن يلجأ إلى الخارج فقد انتفت عنه صفة المواطنة و هوعميل عميل عميل(ثلاثا) .....و الله أعلم

-:سادسا:عزيزى الضابط

تحدينا الأخ شرقاوى أن يثبت إدخال ورقة كرتون فى مؤخرته.....و لم يستطع
تحدينا الأخ شرقاوى أن يثبت تدليك الأمن لخصيته اليسرى .....و لم يستطع

تالله إن حناجرنا لتتمزق و أكفنا لتلتهب من كثرة الهتاف التصفيق لهذا الأسلوب المستحدث فى تأديب هؤلاء المارقين(من قُبلٍ و من دُبر) اللهم سدد خطوكم و لملم شملكم و بارك حكمكم و اجعلكم حبظلم بظاظا.....قولوا آمين


-:أخيرا:سؤال هذا العدد

-:
ما رأيك فى الإصبع الأوسط فى الرسم التوضيحى أعلى النشرة

1-فى مكانه يا ظلمة

2-بيلعب

3-خداع بصرى....إن بعض الظن إثم


و الله أكبر،و العزة للداخلية



الهيئة العامة لمكافحة خدش الحياء التظاهراتى

نشرة دورية تصدر كل سبت عن لجنة السياسات

للاستعلامات:ش قصر العينى-مؤسسة روزاليوسف

السعر:رخص التراب

36 Comments:

At 4:11 م, Blogger غادة الكاميليا said...

نفسي أمشي بقى من البلد دي
أنا مش عارفه احنا عايشين فين
سجن أبو غريب اتنقل لشوارع مصر كلها
وربنا يخليلنا الريس

 
At 5:15 م, Anonymous ألِف said...

هو الرد ال عندي برضو عبارة عن صوت.

 
At 6:45 م, Blogger Mohamed Mehrez said...

عنك يا الف
خخخخخخخخخخخخخخ

 
At 7:05 م, Blogger محمد النقيب said...

ههههه...يخرب عقلك بجد هلكتني ضحك...

 
At 9:30 م, Blogger still breathing said...

شفته مش قلتلكوا كله تمام؟

 
At 10:40 م, Blogger Mr.GEMYHOoOD said...

من اروع التدوينات الىل قريتها من فترة تسلم ايدك بجد

و الاخت غادة الكامليا اللى بتقول انا نفسى امشى من البلد

طب نمشى من البلد و نسبها للمحروس و ابنه هما يبرطعوا فيها

لا احنا نقعد و نتظاهر و نقرف الىل جابوهم

 
At 11:41 م, Blogger AZ said...

هم هيعلنوا امتى عن خدمة توصيل ظباط التدليك لعمل المساج فى المنازل؟؟

 
At 12:55 ص, Blogger Maat said...

LOL
mesh 3arfa ad7ak wala a3ayat wala amawet nafsy wala akabar demaghy khales w abatal afakar wala.....

btw, i like ur blog...i've been meaning to say that for some time :)

 
At 9:30 م, Blogger بعدك على بالى said...

مايحدث حولنا للأسف أكبر من قدرتنا على إستيعابه، ومن طاقتنا على تجاوزه.. حتى لغتك الساخرة والتى غلفت كلماتك، و فجرت طاقات من الضحك ضبطت نفسى متلبسه بها مع سبق الاصرار والترصد، إلا أنه لم تسطع محو مرارة اليأس من داخلى.. فعلا أنا كما قالت غادة لااريد البقاء هنا فى المحروسه والأفظع أننى بدن مؤمنه بأنه لافائدة..فهل نستحق كل مانحن فيه..؟لا اعرف....

 
At 10:52 ص, Blogger abdallah ahmed , عبدالله احمد said...

مدونة رائعة بجد

 
At 8:20 م, Anonymous Epitaph said...

and that's what I call black comdey!

 
At 1:03 ص, Blogger hesham said...

ايه يا باشا البوست الجامد ده

احييك على خفة دمك اللى سطحتنى ع الارض من الضحك

فيبدوا ان السواد اللى حوالينا بيخللى ادامنا حل من اتنيين

يا اما نكتئب و نعيط ونقطع فى هدومنا
وده طبعا خطر اليومين دول على اساس انهم بيقفشوا فى المختلين عقليا

يا اما نضحك اوى و ندمع برضه م الضحك

و اوعى عقلك الملىء بالتفاؤل الوهمى يصورلك ان فى حل تالت ممكن يقودنا لاى حاجة كويسة فى بلدنا المحروسة

ملجوظة:
اقترح عليك بجد ان تعمل بوست جديد موجه من وزارة الداخلية-قسم مكافحة التدوين الى المدون و تبدأه ب

عزيزى المدون


ايه مش مصدق ان فيه قسم مكافحة تدوبن طب بص
هنا
و
هنا كمان

و مش بعيد اللى يحقق مع المدونيين يكون كرم جبر نفسه

اما بالنسبة لاجابة سؤالك يا باشا فالصوبع بيلعب ياناس..بيلعب و حاسس بيه

والله اكبر و العزة للمدونين

و سلام بقى علشان طولت عليك يا عسل

 
At 2:57 م, Blogger 451 فهرنهايت said...

ينصر دينك ياشيخ
مبدئيا مش هاعلق على أسلوبك لأنه خطير ..خطير ..خطير (ثلاثا).. وكذلك طريقة العرض
يااااه ... باتباع تلك النصائح الست المباركة تصبح مصر بجد بدل الأمن والأمان ياللللي
لن يخدش حياء ولن يهتك عرض ولن تمس المؤخرات الشريفة للمواطنين مادمنا نسمع الكلام
ثم ان الكيلو 107 براح ويساع من الحبايب ألف ... بالاضافة الى كونه الكيلو المفضل بالنسبة لي
أخي المتظاهر ... سماعك لتعليمات وزارة الداخلية ومحافظتك ع النظام .. هايطول مدتك ويوسع سجنك ان شاء الله

 
At 8:34 م, Anonymous TigerEye said...

من أروع ما قرأت في الفترة الاخيرة


وبالمناسبة مدونتك جميلة جدا
وانا بتابعها باستمرار
لأنها بحس انها بتعبر عني

يبدو ان الأطباء على موجة واحدة :)


د.أحمد عمارة

 
At 11:04 م, Blogger shababik said...

كل شيء انكشفن وباااان
البلوج بتاعك جميل يا دوك
ودمك شربات بجد
انا بحمد ربنا دلوقتي اوي علي نعمة التنكيت والتهريج اللي عند المصريين ف اسوا لحظاتهم

 
At 11:51 م, Blogger ayhm jzzan said...

الله يكون معنا ويساعدنا ويحمي هل الوطن
مصر حرة أبية بشعبها الحر القوي
تحية لمصر ولكل المصريين الشرفاء

 
At 5:47 ص, Blogger تمر حنه said...

ياكش تولع
بالرغم من وعودك بزيارتى و ماعملتهاش فانا كنت واخده على خاطرى شويتين منك و لكنى لم أستطع منع نفسى من التعليق عندك لأنى سخنت أوى!ا
بعد ماكتبت كمالة للبيان الجلل بتاعك اديتو باك سبيس لأن الكلام ده واعر و بيعور فى الحتة الجوانية صحيح و ماليش نفس للسخرية -
الكلام دا كبير و السكوت عليه مش تمام
بعد محاولات اخصاء المواطن معنويا تحولت المحاولات الى فعل !!!!!ا
يا كبدى يا شرقاوى و اااااااااااه يابلد
الأسم محمد و لكن النأب شرقاوى
نفسى استسمح الشرقاوى و أبوس على راسه لأنى السبب فى اللى جراله
أنا جبانه و بكمه و خرسه و عايزه أعيش جنب الحيطه و أربى العيال
الجدع ده كان بيقول كلمة حق عشان عيالى يعيشوا بكرامتهم
حقك عليا يا شرقاوى و يحميك يا ولدى

 
At 2:17 م, Blogger هوميروس said...

ايه ياجدعان ماهو كل حاجة تمام والحياة اكس لارج
الشعار المسموح به في التظاهر
عاشت مصر حلوة مستقرة

 
At 7:13 م, Blogger كمانجه said...

أنا لن اقول كلاما تقليديا لأن الكل بيسب ويلن فى البلد اللى كبرتنا وعلمتنا وفى الراجل اللى سهران على رحتنا والناس اللى بيعرضوا نفسهم للخطر علشنا
أيه الضمير دا؛ ما فيش دم خالص ؛دا حتى الرحمه حلوه ..الناس هتعمل أيه أكتر من كدا ياعنى أنا مش عارف أنتوا بتفكروا فى أيه
الله يخرب بيتك ياحسنى يالى خليت الناس تتكلم كدا

 
At 1:05 م, Blogger manora said...

جاااااااااااامدة
ايه ده الواحد مضحكش بالمنظر ده من فتره
فعلا انا مع هشام
عايزين بوست تانى بقى من وزارة الداخليه
انت مشكله بجد

 
At 4:01 م, Blogger إياكش تولع said...

غادة

يا ساتر...مالك يائسة كدة ليه؟
اصبرى على جار السو


ألف و محمد محرز
شكلكوا اسكندرانية....مش كدة؟
:)


محمد النقيب
أهلا بيك
شكرا على المرور


ولاء
كله فى التمام
المهم ....انتى فى التمام؟


جيمى هوود
الله يحفظك


Az
مافيش ضباط بيروحوا البيت.....المواطن يروح القسم و ياخد الجلسة و يتنه راجع على طول


مااااات
لا تعيطى و لا تضحكى....غطينى و صوتى بس
شكرا على التعليق
:)


بعدك على بالى
الصراحة بالحالة اللى احنا عليها دى ،فاحنا لا نستحق أفضل من هذا النظام


عبدالله أحمد
بجد التدوين كسبك بالبلوج بتاعك....رسوماتك هايلة عالمدونة و فى الدستور


ابيتاف
!!!!!هية بلاك كوميدى بالنسبة لنا،انما بالنسبة لشرقاوى حاليا.....أشك


هشام
حبيبى....أنا برضه شفت إن الصباع فيه حاجة غلط،شكله مش مضبوط......بس انت حاسس بيه ازاى؟
جديدة حكاية مكتب مكافحة التدوين.....تخيل و انت قاعد بتكتب كدة إن العادلى مكلف نفسه و فاتخ مكتب عشان (يكافحك)....أى فخر هذا !!!
حلوة الله أكبر و العزة للمدونين دى

شكرا يا غالى على التعليق


فهرنهايت
يا باشا هذا من بعض ما عندكم....مالك كنت مختفى كدة؟
لا و انت الصادق.... سماعك لتعليمات وزارة الداخلية ومحافظتك ع النظام .. هايحافظ على خصيتك و يحمى مؤخرتك

Tiger eye
و الله يا ريت أكون أستاهل كل الكلام الكبير دة....خصوصا من أحد زملاء الكار المهبب اللى احنا فيه دة
شكرا على المرور

شبابيك
!!!!!فعلا.....هية دى أسوأ لحظاتهم
شكرا يا عزيزى....بالمناسبة مدونتك حلوة جدا


Ayhm jazzan
آمييييين يا رب

تمر حنة
والله والله والله ربنا اللى عالم
انا مش عارف حظى ماله فقر قوى كدة معاكى


هوميروس
الشعار الجديد حيبقى(التظاهر فن و ذوق و أخلاق)

كمانجة
!!!!أنا معاك يا باشا......فى آخر سطر بس

مانورة
الله يكرمك يا منار
أدينى بطلت أبعتلك تاجات أهه
:)

 
At 2:39 ص, Blogger manora said...

لالالا
انا كده ازعل
يا فندم ابعت زى ما انت عايز
انا كنت بهزر
بس الظاهر انى مبعرفش اهزر

 
At 3:58 م, Blogger إياكش تولع said...

مانورة

!!!!يا باشا احنا مايخلصناش زعلك

حاهريكى تاجات من هنا و رايح

 
At 12:33 ص, Blogger adhm said...

ابعتوا انتوا لبعض تاجات
وانا الضحية فى الاخر

 
At 3:45 م, Blogger hesham said...

حاسس بيه يا باشا قصدى يعنى حاسس انه بيلعب فعلا..مش اكتر..بيلعب فى مكانه مش فى حتة تانية لاسمح الله..اوعى تكون فهمتنى غلط...لا..شكلك فهمتنى غلط

اخ منكوا يا دكاترة...دايما كده مـخكوا بيروح للحاجات اللى فيها
physical contact
:)

 
At 9:32 م, Blogger islamventura said...

سيبك من الشعب ده
دهه ما يستهلش ان حد يتظاهر له او عنه فهو شعب اسفا ان يكون سلبى
و لذلك يجب التظاهر ضد هذا الشعب المصرى الاصيل الجميل الطيب لانه كالعادة يموت الكبير و هم يعيشوا
و لو وصل متظاهر زيك فالصراحة التجارب السابقة غير مشجعة و توضح انه دائما ما يقمع المعارضين و يصل بهم الى حيث وصلت انت ايضا اذا ما فشلت

 
At 9:33 م, Blogger islamventura said...

islamventura.blogspot.com

 
At 9:10 م, Blogger Bella said...

انا مش ح اقولك غير كلمتين زي اللى قالهم اخوكم الكبير كرم جبر لضيف مش فاكرة اسمه صراحة وهو بيلومه ويؤنبه على غلطته في حق البلد

انت يادكتور ياللى لسه متخرج اول امبارح تعرف ايه عن البلد واللى تعبانين فيها وسهرانين على امننا وسلامتنا.

نسيت مصر اديتك ايه بداية من التعليم وانتهاء باي حاجة تيجي في سكتك بقى وانت وبختك .

نسيت يادكتور الوزرا بيتعبوا قد ايه علشان ترتاح انت وكل المصريين ( الراحة الابدية يعني ) .

نسيت ونسيت ونسيت ( ثلاثا برضه )

الحقيقة ان كرم جبر مثله مثل المدعو مجدي الدقاق وغيرهم من مطبلاتية النظام متابعة كلامهم تبعث على الغثيان ونفاقهم الواضح ممجوج.

لكن نقول ايه في هذه الاشكال التي تظهر لنا في كل ركن وكأنهم موصوفين لنا

صراحه اسلوبه يفقع المرارة

قبل ماامشي احب اسجل اعجابي الشديد بالمدونة الرائعة والتي احرص على متابعتها كلما ساعدني الوقت

واحب كمان اقول للجميع مصر بخير بس احنا اللى مش واخدين بالنا على راي السيد كرم جبر ناقصنا جرعة وطنية

انا افضل اخدها بعيد عن هيئة المصل واللقاح لان كل تطعيماتهم فاسدة

 
At 12:56 م, Anonymous مختار العزيزي said...

يابن الذين!! تدوينة حلوة بجد... بس الرابط بتاع المجلة العظيمة روزا مش شغال. نفسي بقي المجلة دي تدخل في الخصخصة ويشتريها أي حد من رجال الأعمال خلينا نرتاح شوية

 
At 2:50 م, Blogger إياكش تولع said...

أدهم
خلليها علينا المرة دى:)
المرة الجاية....حابعتلك التاج على طول
هشام
أخ.....تصدق انا كدة فهمتك غلط
بس بينى و بينك،انت فهمتنى صح
:)


إسلام فنتورا
نورت البلوج


بيللا

اللى يسمع كرم جبر المفروض مايروحش المصل و اللقاح،لكن يروح مستشفى الكلب(على رأى عشرينات)

شكرا على الإطراء

مختار العزيزى

و هية يعنى دلوقتى مش تبع رجال الاعمال و لجنة السياسات؟
شكرا على المرور

 
At 3:09 م, Blogger Sarwa said...

:)))
ياواد يالعيب

 
At 5:32 ص, Blogger المزاجنجي said...

دكترة اسمح لي ادلعك لانك بتدلعنا جامد وانا ما زلت شاكك انك طبيب تخدير وبتعمل دماغ بنج قبل ما تكتب .................
لكن لي سؤال علمي طبي بحت هو تدليك الخصية اليسري يفرق كتير عن تدليك الخصية اليمنى وما هي الاثار المترتبة على هذا التخصيص وليه بقوا يستخسروا ويحطوا كرتون كانوا شغالين الاول بالشوم ولاد الصرم ولا قلة الانفاق وصلت لده كمان ولا يمكن ومعلش يا محمد والله ما اقصد اهينك او اذكرك بسوء لانك ارجل من اي كلب منهم وارجل من رجالة كتير مننا بس يمكن هما رأفو بيه لما لقوا الاندر بتاعه ملون وبما انك على اتصال بحبايبنا وبتجيب لنا الاخبار طازة بنار الفرن والنشرات بتلسوع فياريت تجاوبني ومعلش طولت عليك بس اعذرني لاني لما انضربت بهدلوني اكتر من اليمين والشمال وتحياتي لك يا دكترة

 
At 5:58 م, Anonymous محمدين said...

بص ياعم إياكش تولع أنا أول مره أقرألحضرتك بس دليل هذه المظاهرات خطير جدا جدا المهم ياعم الحاج ربنا يستر وتعد الأيام القادمه على خير
وبخصوص إنت طبيب أيه أنا متيقن إن تخصص حضرتك باطنه ودا واضح من خفة الدم المتناهية
ومعلش على الإطالة

 
At 3:38 ص, Anonymous غير معرف said...

منك لله يا شيخ
عندي شغل الصبح وشاكلي مش حنام الا لما أقرأ المدونة كلها .
يخرب عقلك انت ايه ؟ انا عمري ما ضحكت بالشكل ده في حياتي رغم اني رسام كاريكاتير .
مش عارف بجد أوصفلك ازاي اعجابي بالمدونة دي
تحياتي

 
At 12:47 ص, Anonymous غير معرف said...

ايه الحلاوة دي يا برنس
الله ينور
بس يا اخي اللي فهمته ان كلكم دكاترة
ممكن استفسر عن حاجة
هو البنج اللي الشعب واخده نوعه ايه بالظبط؟
علشان انا عايز اجربه على مراتي
يمكن تنام وما تقومش زي اللي حصل للناس كلها
وان كان له مصل مضاد هو شكله ايه علشان لو لقيته عندي في البيت ارميه

 
At 12:27 ص, Anonymous غير معرف said...

best regards, nice info accent area rug thong ass free sex movie Jeff rollins tax honda brake pads Forester manual repair subaru Online sportsbook gambling online sportsbook onlin Ace triple tree honda 1100 Soccer cletes Add acyclovir

 

إرسال تعليق

Links to this post:

إنشاء رابط

<< Home