الأربعاء، سبتمبر 26، 2007

العادلى سبيكنج


يقول الله فى كتابه العزيز : (يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين)...صدق الله العظيم


أما بعد

فقد دأبت قلة قليلة مندسة (تبلغ سبعين مليون مواطن) فى الآونة الأخيرة على ترديد مجموعة من الأخبار الكاذبة و الشائعات المغرضة و الترويج لها متناولة صحة قلب مصر ,و روح مصر ،و فشة و كلاوى مصر ألا و هو سيدنا الرئيس محمد حسنى مبارك،مما أدى إلى ضرب الاستثمارات و طفح المجارى و تسميم المحاصيل و غسل أدمغة الأغلبية الساحقة من شعبنا الطيب المطرمخ على جانبى النيل منذ قديم الأزل



و لقد شارك فى تأجيج هذه الحملة المشبوهة حفنة من الصحفيين الأصفراوية (فئة المشنبراتية)،و الذين طغت الضغينة على بصائرهم،وكسى الحقد قلوبهم،و أعمى الرمد الربيعى عيونهم عن هول ما تم فى مصر (هوة اللى عملناه فيها دة شوية!) من نهضة فى الثلاثين عاما الأخيرة ....تعاموا عن إنجازاتنا المعمارية الضخمة (كداندى مول و الفورسيزونز)...تناسوا فتوحاتنا الطبية (كشركة هايدلينا)....غضوا الطرف عن ريادتنا الإعلامية ( الطفل المعجزة...تامر أمين)....حرقوا الأخضر و اليابس....قتلوا الديمقراطية....ذبحوا الشفافية (اللى هية أحلى حاجة فيا)، بل و وصل بهم الشطط إلى إنكار نسائم الحرية التى تسرح فى سماء بلادنا و تمرح على أقفية مواطنينا


و إننى من هذا المنبر الحر (يعنى حر فى اللى بيعمله!!) ممثلا فى وزارة الداخلية لا أستطيع أن أصف مدى فجيعتى ، بل و فجيعة الشعب المصرى -من أكبر وزير لأصغر شاويش- عندما تواترت إلى مسامعه، و تناثرت إلى معامعه مثل هذه الإشاعات المسمومة التى فتتت أكبادنا و طالت حشاشة قلوبنا، فقد شعر كل منا أن جزءا من داخله يغيض (عايز أعيط يا بلبل!)، و أن عينه من الدمع تفيض ( بأقولك سيبنى أعييييط!!!)...فأنت القلب الكبير،و أنت نعمة و إحسان، تختال علينا بحكمتك و تغدق علينا من سيالتك....فكيف لا و أنت الأب و الأم لهذا الشعب اليتيم الذى التقطته من على باب السيدة زينب و كفلته بعطفك و برحمتك



و إذا كانت الداخلية تتعامل دوما مع هؤلاء المشنبراتية معاملة الأب الحليم لابنه شارب الكلة، متخذة شعار (إنهم يشنبرون..ماذا يشنبرون......دعهم يشنبرون)، فإنها و الآن و فى الوقت الذى بلغ فيه السيل الزبى ،وبلغت فيه الروح الحلقوم فإن شعارنا سيصبح (من يشنبر لنا نشنبر له!!)......و أعلنها صريحة أننا لن نقبل أية شنبرة بأى حال من الأحوال


وإن الداخلية نابعة من حرصها على الصحافة النظيفة الشريفة و انطلاقا من أن (أحلى من الشرف مافيش) فلسوف تدعم الصحفيين الشرفاء أمثال القط (الشهير بأبو شبت) و عبدالله كمال و الدقاق (فئة المطبلاتية)،واضعة أيديها فى مؤخر....-عفوا- أيديهم ،و لتنصرنهم و لتؤزرنهم مستعينة بالله و الأمن المركزى، بادئة بإطلاق حزمة من التشريعات و القوانين الجديدة و التى ستلزم كل صاحب صالون حلاقة بشراء عدد معين من نسخ هذه الجرائد أسبوعيا كشرط لتجديد تراخيصهم....و نعيما مقدما




أما هؤلاء المرجفون فى الأرض و الذين عتوا عن أمر ربهم و حقت عليهم الضلالة من الصحفيين فطوبى لهم المقشات فى أدبارهم، و الكمامات فى أفواههم، و لنفضحنهم فضيحة المطاهر يوم طلوعه عالمعاش (و يا لها من فضيحة!)، ثم لنقطعن أعضاءهم (التحتانية و لا مؤاخذة) من خلاف،ثم لنعلقنها على سلالم نقابة الصحفيين ضامنين لهم محاكمة عادلة أمام محكمة الطوارئ ليكونوا عبرة لغيرهم من الفسقة و المنحرفين و الذين ارتضوا أن يبيعوا ضمائرهم بثمن بخس دراهم معدودات....سفوخس




و نهاية فإننا ندعوا لأبينا الحنون و حرمه المصون و نجله الميمون بموفور الصحة و العافية، و أن يحفظهم من عين كل حسودى و حقودى... أو كما قال الشاعر

و تينة غضة الأغصان باسقة....قالت لأترابها و الصيف يحتضر


و السلام عليكم و رحمة الله و بركاته


و لا عزاء للمشنبرين



وزير بدرجة محب لمبارك

شنبرة الميمونة....مش على الخريطة

40 Comments:

At 2:40 م, Anonymous شاةثي said...

حمدا لله علي السلامة يا كبير
متبقاش تختفي تاني كدة

مصر مبارك
و الله ولي التوفيق

 
At 4:20 ص, Blogger m.bazeed said...

ايوة ....هو ده الكلام ...مش تقولولى الريس تعبان.. الريس عنده برد.. الريس عنده طفح... الريس عنده بواسير
لاااااااااااااا,ريسنا حبيبنا محبوبنا ارفع واعلى من كل الى بيتقال عليه ,وانا من منبرى ده بايدك فى كل كلمه قولتها بل واطالب باعدام الفئه المندسة العميله الى بتروج للشنابر بالخازوقة
دمت لنا راس يا ريس عطوف حبيب مهاود

ومصر من غير مبارك ماتبقاش مصر يا عبلة(هاتبقى فرنسا على الاغلب)

 
At 12:10 ص, Blogger بينى و....وبينى said...

تحياتى ليك وللبوست الجامد ده. والله على رأيك كلنا ظلمين بابا حسنى رضى الله عنه.بجد عبرت عن الى جوايا.الراجل ده متعرفشى انا بحبه حب .الصراحه هموت من من كتر حبى له . وبعدين لاحسد ولاار يعنى هو مش بيحوق فيه اشعاعات الراجل كالاسد فى مكانه صامدا.
ملحوظة.يعنى ايه شنبرة

 
At 2:34 ص, Anonymous غير معرف said...

بوست جامد جدا بيعوض المدة اللى اختفيت فيها عننا
حمد اللة عالسلامة مرة تانية
انا كمان بسأل يعنى اية شنبرة دى
مها....

 
At 8:31 م, Blogger manora said...

elzaher eno matlb 3am:kolna 3ayzeen na3rf ya3ny eh shanbra!wa hal hya ded eldemokratia we onkl 7osny la sam7 allah?


La bs bgd nemt kteer wE s7eet 3ala post wahmy.go on ya doc.

 
At 4:20 ص, Blogger مطرح ما ترسى....دقلها said...

اهلا وسهلا والعود احمد
انا ناقص اغنى كمان
اولا اياك واطالة الغيبة مرة اخرى


ثانيا بقى
معرفش الفئات المندسة دى بتندس ليه اساسا
هو حد قالهم يندسوا؟
انشالله ياشيخ ينداسوا بالجزم ومش مهم هما
المهم الرويسة يبقوا حلوين

طب لو الباشا حصله حاجة ولا استهوى؟؟؟
يالهوى ده انا كنت اروح فيها
ومش راجع

هو اللى مأكلنا هو
هو اللى مشربنا هو

والله الواحد طق خلاااااااااص
ولكن امر الله كان مفعولا

ابقى اتفرج على مسرحية تخاريف الجزء بتاع المسيطر هتكيفك قوى
وبالمناسبة اسمها شمبارة الميمونة ( اصلها جنب بلدنا)

والسلام ختام
ابقى عدى علينا كدة فى البلوج يمكن (يمكن) اشربك حاجة

 
At 4:35 ص, Anonymous غير معرف said...

فعلا بوست جامد جدابعد غياب طويل،ارجو الاستمرار يا د. :)
مهاد....

 
At 10:01 م, Blogger sagittarus said...

بوص بقه يا معلم..انا قريتلك كتير قوى قوى كمان والشله بتاعتى تقريبا كلنا بنقرالك وبحب الاسلوب الساخر بتاعك جدا ..بس تعالى نحسبها بالورقه والقلم انت استفدت ايه بعد البوست المشطشط ده ..يعنى فى حاجه اتغيرت
اولا اوزن المنفعه والمفسده
المفسده ..استخدمت اقتباسات كتير من القرآن بعضها يصح والبعض الآخر فيه تجاوزات...واتكلمت عن لسان العادلى وفيه دعوات ف النص والفاظ (سيدنا الريس ...ولى نعمتنا ..هى فعلا ساخره)بس هل يجوز لك ان تلوك مثلها دون مراعاه للعقيده ..أرجو أن تتحرى الا تضر بأسقف العقيده عند استخدامك الالفاظ والتعبيرات...بعيدا عن هذا المنطلق
فيه ايه تانى يا واد يا ساجى!!اه بوص برده معايا
انا بحس ان انت وهما ما فيش فرق بينكم ..يعنى انت مكبوت وعايز تفضى كبتك فى الكلام ..مجرد كلام ..لا تغيير
لو انت وكمان 3 أو 4 من الشباب الواعى ..(حركه كفايه الجعجاعيه برده تمشى )لو اجتمعتم وعملتو جمعيه تنمويه ونميتوا ف المجتمع وخدتوا الهرم من تحت وطلعتوا بيه لفوق
صدقنى هيبقى احسن استغلال لطاقتك والمواهب اللى ربنا ادهالك واللى اكيد هتسأل عليها
صدقنى انت موهوب بس مضيع نفسك فى كتابات لا هدف منها سوى السحل ان عاجلا ام آجلا
فلتتريث ولا تكن مشنبراتيا لمجرد الشنبره
بل كن مشنبراتيا اذا دعت الحاجه ولتغير واقع وعلى اسس سليمه
ومستنى بوستك الجديد بفارغ الصبر
عليمى
....
ابقى زورنى

 
At 9:56 ص, Blogger hesham said...

حمد الله ع السلامة يا باشا و دايما كده حاطط ايدك على الجرح بس بحنية

الداخلية يا و لداه مش عارفة تلاقيها منين و لا منين من الارهاب و الجماعات الاسلامية و لا الصحفين اللى مش مقدريين ان امن و امان و سلامة و صحة و شرف مصر كاها امان بين ايديهم

حقيقى الداخلية مظلومة يا عينى و مش لاقية حد يدافع عنها

و الصفيين زودوها اوى و عامليين يزودو فى الكلام مع ان الداخلية طول عمرها تقبل بالراى و الراى الاخر و طول عمرها منبر من لا منبر له

مع خالص تحياتى
just for refrence
من يشنبر لنا ربنا يسامحه

 
At 1:53 م, Blogger على باب الله said...

أنت رهيب بجد

مش معقول

خرافة

أمبوزيبل

إنكريديبول

فانتاستييك

أنا أشكر الحظ السعيد اللي رماني علي مدونتك

 
At 2:19 ص, Blogger l0ma said...

تتقطع لسان الى يتكلم على بابا حسنى واللة لاقول لاونكل جمال يعلقة فى قلب المجلس
بابا حسنى ماما سوزان احنا ولادكوا هنرفع راسكوا

بوست جااااااامد وعلى فكرة انا برضة بشكر الحظ السعيد الى كعبلنى فى مدونتك

 
At 5:22 م, Blogger wael said...

احلا قانون في البلد هو قانون شنبرني واشنبرك
ماتبقاش تغيب كده

 
At 4:05 م, Blogger coca said...

اولا انا مش عارفه ايه علاقه الايه بالكلام معلش انا مش فاهمه لو كلامي غلك استأذنك ترد عليا بالصح
الايه بتبه الناس اننا قبل ما واحد يجي يتهم ادامنا بني ادم ويقول عليه حاجات نتبين الاول علشان منظلموش

ثانيا بالنسبه للصحفين
انا ب هتكلم بمنطقيه بعيدا عن الطرق الساخره من الحكم والرئيس
هو دلوقتي لما انشر خبر تدهور صحه الرئيس ةانه بيموت دا صح ولو جاوبنتي وقولت صح قولي ليه
لانه طلع بعد الاشاعات دي واثبت وجوده وكانت صحته كويسه يعني والله اعلم
ثالثا انت شايف ان دي الصحافه دلوقتي صحافه شريفه وتقدر تصدق اللي بيقوولوا انا عن نفسي لا لانه بقي تهكم علي النظام وشعارات بتترفع علي الفاضي ومبيعملوش حاجه عدله
انا بمقولش علي عيسي والباراشي او الباقي انا بتكلم عامه

 
At 7:25 م, Blogger yasser shams aldien said...

اللهم صلى على سيدنا محمد حسنى وعلى ال سيدنا محمدحسنى كما صليت على سيدنا محمد وال سيدنا محمد

ده دعاء وزير محب برضة للسيد الرئيس

 
At 1:30 م, Blogger Dr.Nassif said...

كالعادة
بوست رائع يضمنلك الضحكة فى اسوأ حالاتك
متبقاش تغيب تانى
:)

 
At 7:05 م, Blogger osama said...

هههههههههههههههههه...
لهذوه الدرجة يا راجل حرام عليك... لهذوه الدرجة مشرئب الأعناق ثاني عطفك عن المجد والحرية التي تتمتع بها مصر مبارك...
دا زي ما قال احمد مطر
نِعمةٌ منهُ عَلَينا

إذْ نَرى ، حين نراهْ ،

أنَّهُ لَمَّا يَزَلْ حَيَّاً

.. وما زِلنا على قيدِ الَحياهْ !
فتفائل كده دا التفائل لذيذ

 
At 1:26 ص, Blogger mahmoud farag said...

أشكر الحظ الجميل اللي حدفني هنا في المدونه الجامده دي
بوست رائع ورساله معناها جميل من شخص نحترمه كلنا ونحترم أولاده اللي طايحين في الخلق
غصب عننا طبعا

وكما قال المغني الكبير عبد الحلم حافظ

شنبرني ..شنبرني .. شنبرني في أي كمين
أنا كده كده تعبان .. زهقان .. حيران .. بضرب بانجو وحشيش ... شنبرني

 
At 10:58 ص, Blogger Dr.Mohammed Gohary said...

شنبارة الميمونة مش علي الخريطة
تصدق واحد صاحبي من هناك اه والله
بيته عند ميدان الجميزه
هههههههههههههههههههههه
ايه يابني ده ايه اللي انت عامله ده
صراحة فوق الفاجر بشوية
يخرب عقلك يا راجل
ربنا يعينك ومتتشمبرش

 
At 9:55 م, Blogger amy lee said...

اولا هقول كل سنه وانت طيب يادكتور
وبوست رائع
وفعلا طولت الغيبه

لكن مش هعلق ع البوست لانهم علقوا ربنا يكرمهم
وانا عجبني الكلام بشده..

بس عاوزه اقول لساجي حاجه
بص ياعليمي..
خالف تعرف
وشكرا ع الرد الجميل ف البسوت بتاعي
بس على فكره كنت عوازه اقولك حاجه من زمان
اسلوبك ف الرد ده..بيعمل مشاكل
بيتهيألي المفروض انك اتعلمت من الي حصل
لكن لازالت طريقتك نفس الطريقه
اتمنى انك تغيرها..

 
At 11:47 م, Blogger هموم الناس قدرى said...

يااخى انا مش عارف انته مش مقدر قيمه الكلام اللى انته بتقوله ولا ايه
فعلا البلد بتخسر فى حالة اشاعه مثل تلك التى تناولتها .. نحن مازلنا نتأثر بحياة رئيس الجمهوريه واى منصب رفيع له تأثيره على الوضع
نحن لانتحدث عن مدير اداره مثلا انما نتحدث عن رمز من زموز البلد
انته لوحد اكلم عن والدك بطريقه فيها استهزاء ستتركه؟
طبعا سينال العقاب
بس بجد اسلوبك رائع ياريت تستغلوا بشكل افضل فى مناحى اخرى
ارجو الزياره

 
At 7:03 م, Blogger 451 فهرنهايت said...

جامد طول عمرك ومفتري
وحشتني جدا يازمل
وكل عام وانت بخير
....
وابقى سلملي ع الشنبر

 
At 2:25 ص, Blogger spellz said...

akheeeeeran!!
Ileya abu mady kmaan:d

a7eba a2olak mn maw2e3yy haza wa o3lenha saree7ataan


maaahwana al dam3e l gasooor iza sala mn 3ayny kazebatan fa ankara wadda3aa
falyatashanbar l motashanberoon
wa3ashat mezr whorra mosakhella!

 
At 6:25 م, Blogger yasmine said...

ايه انت فين
مدونتك فظيعة جميلة جدا تخيل انا قريتها مرتين كلها بتطلعنى من حالة الاكتئاب وبتضكنى
ياريت تكتب تانى
مستنينك

 
At 1:59 م, Blogger Rain_Drops said...

عايز أرد على لسان متقال ، قصدي الريس و أقول : دا بعدكم يا متشنبرين خليكم في غيكم تعمهون
:d

 
At 11:01 ص, Blogger barb michelen said...

Hello I just entered before I have to leave to the airport, it's been very nice to meet you, if you want here is the site I told you about where I type some stuff and make good money (I work from home): here it is

 
At 11:53 م, Blogger maha zein said...

انت عارف النظرية في ايه ....النظرية في اياكش تولع... انت مين...انا بيني وبينك كنت بقلب كده في اسامي المدونات الي فى هوامش مدونات زمايلي ولقيت اسامي مدونات كتير اوي ، ومرة وحدة قريتها "اياكش تولع" ومشدتنيش الا اني بعد لحظات كده فوقت شويتين وقلت لنفسي كده اياكش تولع ودخلت المدونة لقيتها فعلا والعة وانا مش دريانة بجد اكثر من رائعة وبعدين الكلام ده ممكن يكون بيجي من انهي دماغ بجد الله الله وتحياتي وبجد بكلامكم ده الناس ممكن تفكر فتتألم بتفكر تاني فتقرر انها تتغير فلما تتغير ، هتغير تغير ايه بقه اي حاجة والسلام اصلي شيفة ان كل حاجة عوزة تتغير يلا بجد احييك
بعدين بقه انا لسة جديدة فى التدوين اتمني انكم تتبنوني يعني بطلب منكم بقه تشجعوني واكون شخص بيعبر عن افكاره لناس بتقدر وتساعده انه يتغير ويكون افضل ارجو الزيارة الخاطفة حتي لو السيادة وزير علي درجة محب لمبارك فياريت ذي ما احنا متعودين من بابا مبارك انه بيهتم لحال شعبه وبيدخل ويشوف مدونات اولاده حبيبة لا ويعلق عندهم
http://enahaelhaya.blogspot.com/

 
At 11:13 ص, Blogger إبـراهيم ... معـايــا said...

هوا الواحد منكن يقول لك إيه


********
بس شوةي عادية ، مش زي الحاجات اللي كنت بقراها عندك زمااااااان


تحياتي عمومًا

 
At 12:10 م, Blogger ست البيت said...

رحت فين يا عم الأمور
يعني لا سلام ولا كلام ولا تعليقات على مدونتي ولا حتى بوست جديد؟
طب يارب تروح البيت بعد النباتشيه ماتلاقيش مككرونة وفراخ
تلاقي بصاااااااااااااااااارة...
هه عشان تبقى تقعد سنتين متدونش براحتك بقى

 
At 3:02 م, Blogger syzef said...

يلا اياكش تولع بقي

 
At 6:01 م, Blogger أطباء said...

بعد إذنك ياريت تعرف الناس بينا حتى نستطيع توحيد الأطباء جميعا
وشكرا

دعوة عامة

أطباء بلاحقوق تدعوكم لحضور مؤتمر القاهرة في نقابة الصحفيين الدور الرابع والذي يناقش مشاكل حركات المطالبة بزيادة الأجور
مواعيد ندوة أطباء بلاحقوق هي :
1- يوم الجمعة بالتعاون مع حركة تضامن من الساعة 6 مساء إلى الساعة 7 والنصف .
2- يوم السبت بالتعاون مع جمعية الحق في الصحة من الساعة 3 والنصف إلى الساعة 5 والنصف .

نرجو الحضور والمشاركة

وشكرا ..................

 
At 8:16 م, Blogger أبو علي said...

ياااااااااااااااااااااااااااااااةةة
يا عم دانا مستنى البوست دا من سنه تقريباً,,أمانه عليك يا شيخ متعاوائش علينا, ومستنيك تعدى

 
At 7:02 م, Blogger د/اجدع بنوته said...

ايه يادوووك

انا عرفت ان حضرتك كنت ع مدونتى

ايه اخبارك ؟؟ يارب تكون بخير

انقطعت عن التدوين ليه بجد ؟؟ خساره

يارب تكون تمام جدا

تحياتى

 
At 8:07 ص, Anonymous semsema said...

بجد لازم تكمل اوعى تختفى انت رااااااااائع ودمك خفيف جدا وبتقول حاجات خانقانا وفاقعة مرارتنا
ربنا معاك

 
At 10:54 ص, Blogger fire bird said...

ايه البوست الجامد ده
انا عرفت المدونة بتاعتك دى
عن طريق مدونة
الاجنحة المكسورة(afew good men )
وما كنتش اعرف
انك بجد مبدع كده
بقولك ايه
خليك وراهم ما تسيبهمش
ماشى
احنا وراك
ولما تقع ما نعرفكش
اتفقنا
هاجى عندك دايما
الى اللقاء

 
At 3:41 ص, Blogger سنووايت said...

فقد دأبت قلة قليلة مندسة (تبلغ سبعين مليون مواطن)

هههههههههههههههههههه
انا دخلت هنا بالصدفة , مش عارفة جيت منين انا نسيت
بس بجد موضوع مش ممكن

 
At 2:08 م, Blogger هوميروس said...

حبيب قلبي أغيب وأتغير وانت لسه علي قديمه
ربنا يحميك لمصر يابني
بس عشان خاطري بلاش الشنبرة دي عشان احنا عندنا ولايا

 
At 9:40 م, Blogger كبر الجى وروق الدى said...

اهيء اهيء اهيء قطعت قلبي تصدق طلعنا ظالمينهم ربنا يجعلك نصره للمظلومين

 
At 9:24 م, Anonymous غير معرف said...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

 
At 2:11 ص, Anonymous غير معرف said...

احنا نحب نرد الخير باحسن منه وحيث ان انا من الحكومة فقد قررنا استضافتكم عندنا لمدة قصيرة من غير كلام هتوافق هتوافق قول كدة خمسة وعشرين سنة وابقى قابلنى لو كملتهم
الفطار اكل على الأفى او القفى او تحت شوية
الغذاء :- استمتاع برؤية الانجازات
العشاء :- ندامة على اليوم اللى امك ولدتك فيه
وبعدين ياد يا بتاع شنبارة ...
مش تعدل دماغك وتعقل
خليك زى بصرة
خد عبرة من العالم الجبناء
اقول لك سافر برة...وتلاقيك حاولت ومعرفتش
احسن حاجة يا حبيبى تحط المسدس فى الشاى وتنتحر
لان العيشة فى البلد دى انتحار

 
At 1:57 ص, Blogger Mahmoud Alhamrawy said...

اتحدث عن موضوع متعلق بالانترنت ولكن مختلف جدا عما تعودنا او قرأنا فانا تحدث عن استثمار الانترنت
بحرفيه شديدة قائمة على اسس علميه في مجالين اصبحا هامين جدا في هذه الأيام وأبدأ الحديث عنهما بسؤال
ماذا تعرف عن التجارة الالكترونية ؟
فكر
طبعا ليست تجارة الالكترونيات مثل اجهزة الكمبيوتر
ولكن التجارة الالكترونيه مصطلح جديد معناه البيع والشراء
عن طريق الانترنت داخل نفس البلد او بين البلدان وبعضها ( الاستيراد والتصدير )
وممكن يكون بي افراد وافرد او بين افراد وشركات او بين شركات وشركات
ليه انا بعرض موضوع زي ده ( وكتير حيقول ايه الكلام ده )
لان فرص عمل الشباب دلوقت محدودة جدا لكن في وجود الانترنت يعني بنتكلم عن
ملايين الشركات انت ممكن يكون عندك شركة ( موقع يعرض منتجات )
من غير ما يكون عندك مصنع ولا مخزن
بجد
ده نوع من التجارة الالكترونية اسمه ( Drop shipping ) او اسقاط الشحن
وفيه مواقع مصرية متخصصة في المجال ده وان شاء الله حدلكم على بعضها
التسويق الالكترونى
طبعا اي تجارة تحتاج الى تسويق ( المنتج لن يبيع نفسه ) والتسويق ببساطة هو دعايه
و ده ابسط من التجارة الالكتروني
ودلوقت اصبح في وظيفة مسوق الكتروني في كثير من الشركات وبراتب محترم
تخيل انك ممكن تشغل في التسويق الالكتروني وانت قاعد على الفيس بوك
تعرض المنتجات وتشجع الناس على شرائها
ايضا ال يوتيوب وسيله تسويق ده حتى الاميل وسيلة تسويق
بس طبعا الكلام ده محتاج لدراسه
انا بتكلم من خلال خبرة عمل في هذه المجالات
وفيه مواقع دلوقت بتقدم تعليم للتجارة الالكترونية والتسويق الالكتروني
واتمنى أن اكون قدمت شئ مفيدا
واليكم رابط به تفاصيل اكثر عن هذا المجال
http://ecm4u.zxq.net/
( أتمنى من الادارة عدم حذف الرابط لتعم الفائدة على الجميع )
انتظر الردود على الموضوع

 

إرسال تعليق

Links to this post:

إنشاء رابط

<< Home