الخميس، ديسمبر 28، 2006

كل سنة و انت راس ...يا ريس

لا أعرف صراحة كيف أصف 2006

ربما كان هذا العام أحد أفضل الأعوام التى مرت على -حتى الان- و ربما أسوأها، و لكن الشئ الأكيد أنه لم يكن كسائر الأعوام السابقة

لست ثورجيا لأتحدث عن انتفاضة القضاة أو مظاهرات كفاية أو اعتقالات الإخوان،كما لن أننى لن أشير إلى غرق العبارات أو تصادم القطارات(حيث أصبحت مشهدا متكررا لا تنفرد به سنة عن أخرى!!)...بل سأذكر ما أثر فى بشكل شخصى مثل:-

تدرجى الوظيفى من مرحلة(عبده امتياز) مرورا بطور (عبده تكليف)،و انتهاء بتوفيقى فى الحصول على نيابة استثنائية بمستشفى تعليمى لأصبح نائب أمراض جلدية لأقضى معظم وقتى ما بين كتابة أدوية الهرش و بين تهليب العينات من مندوبى شركات الأدوية!


جلوسى فى عيادة فقر بنت كلب،منتظرا أى زبون ابن كلب،يعانى من أى مرض ابن ستين كلب لاكتب له نفس الدوا(ابن الكلب برضه) اللى غالبا مش حافظ غيره



كلاكيت عاشر مرة:واحد صاحبى بيحب واحدة مخطوبة،و وائل بتسيبه البنت بتاعته،مما أدى إلى دخوله فى حالة اكتئاب حادة أدت إلى قيامه مؤخرا بعملية زرع شعر


..................



اكتشافى مسمط حبايب السيدة و عربية رفعت تلوث كأهم المسببات لتوطن ميكروب السالمونيللا وفطر الاسبرجيللس فى أمعاء الشعب المصرى


شكرى لله على أن أمد فى عمرى لأشاهد هدفا كالذى دخل فى عبواحد السيد....و الذى غالبا سيدخل فى عبمنصف مثله فى ماتش الاهلى القادم


اكتشاف مدونتى حفار القبور و بعدك على بالى....و التى أرجوها إلى درجة الاستعطاف أن ترجع إلى القالب القديم لمدونتها بدلا من القالب الحالى و الذى لا يتناسب بروده مع حرارة ما تكتب


عدم قدرتى على التعليق على العديد من مدوناتى المفضلة،فضلا عن الرد على من يتركون تعليقاتهم فى مدونتى!!!!


-:يقينى بأن الشعب المصرى حديد ، و ركبه حديد

انا حاسس انى مش زى الأول يا دكتور

ليه يا عربى

عدد المرات اللى باشتغل فيها مع مراتى قل قوى

طب خد الحباية دى يا عربى ،حتخليك تشتغل فى اليوم الواحد 5 مرات(أى كلام)...بس ابقى ادعيلى

عربى يقلب الحباية بين أصابعه متفحصا ليقول:إيه دة يا دكتور....مهدئ؟؟؟

(مصر بخير يا شحتة)


إعلان الرئيس أنه باق فى مكانه مادام فى صدره نفس يتردد.....يباركلنا فى أنفاسك يا معلم حنفى!!


اضطرارى كل يوم أن أستخدم مترو الأنفاق لأسمع شخصا ما يغنى (أنا قلبى خدامك!!!) ،و أشاهد لاعبا أسودا يحرز هدفا فى مرماه....ربما لو عرف أنه سيتم (تجريسه) فى محطات المترو بمصر يوميا لفكر ألف مرة قبل أن يحترف الكرة من الأساس


محاولة زميلى فى المستشفى إقناعى بأن العقم مرض وراثى ينقله الأب العقيم لابنه


انتصار (البتاع دة)على إسرائيل و السعودية و الأردن و مصر




اكتشافى أن العالم مازال به أولاد ناس لم يتلوثوا حتى الآن كصديق (هلف) ظل يظن حتى وصل إلى تانية جامعة أن الإنجاب يتم عن طريق (البوس)،ولما كانت الدنيا مليئة بذوى النفوس الحاقدة على مثل هذا الطهر فقد تطوع أحد أولاد الحرام ليشرح له فى أذنه(الدنيا ماشية إزاى)...فما كان من صاحبنا أن استنكر قائلا:انت حتستعبطنى ياد،همة كمان حيكونوا قالعين!!!(ليه يا زمان ماسبتناش أبريا ...تيرارام)


معرفتى بناس طيبين استطاع الاستشارى استعباطهم و إقناعهم بمرهم كل ما يدهنوه عالبتاع....يقوم البتاع يطول سنتى كل شهر ...ربنا يستر على مراته على آخر السنة!!!!


اكتشافى أن الغباء له ناسه...حيث دار بينى و بين أحد المرضى فى العيادة هذا الحوار:-

و سيادتك بقى فى سنة كام؟
حضرتك أنا النائب بتاع دكتور فلان الفلانى...أى خدمة؟
بقى حضرتك النائب بتاعه؟
أيوة يافندم
يعنى حضرتك النايب بتاعه بقى؟
أيوة
بتاعه حضرتك بقى النايب ؟
آه
آآآآآآه فهمت.....على كدة بقى حضرتك النايب بتاعه؟
قلت أفقعه قبل أما أطرده:لا أنا مش النايب
لا إزاى ،أمال انت مين؟
!!!!!أنا بتاعه


إدراكى أن برامج الأطفال فى مصر موجهة لشريحة معينة ألا و هى شريحة الأطفال المصابين بحالات متأخرة من التخلف العقلى(المذيعة تسأل الطفل:قوللى بقى يا حبيبى...الفرخة بتبيض ولا بتفقس؟)


و أخيرا اقتناعى بفشلى ككاتب مقال لعدم قدرتى على كتابة موضوع متكامل له رأس و-لا مؤاخذة-وسط و رجلين،و على هذا فسألجأ فى بوستاتى القادمة إلى الفواصل القصيرة و التى اكتشفت أننى لا أجيد غيرها للأسف

كل سنة و انتم طيبين

:-ملحوظة
دى حابقى أقولهالكو بعدين انشاءالله:.........

-:تحديث

حطيت(واحد صاحبى) بدل اسم مهاد عشان كلمنى و قال إنه زعل لما كتبت عنه كدة و قال إن الناس كدة حتعرفه...ماتزعلش يا مهاد!!

37 Comments:

At 2:24 ص, Anonymous غير معرف said...

انا اول واحدة اعلق فعلا الليلة دى عيد

انت فينك من زمان؟؟

المهم مبروك على التعيين عقبال ما تبقى استشارى كده و يزودوك بتاع 3 جنيه كدة

انا بحب حكاية الفواصل دى علشان الواحد يركز و ميبقاش المقال طويل اوى


تخصص حساسية بس ؟؟يعنى مراهم بس طب ما كويس مش بدل ما تحفض ال 50.000 دوا اللى فى الصيدلية كده انت متخصص فى الهرش على رايك و ممكن تحضر دكتوراه كمان

اما عن موضوع برامج الاطفال فده من زمان مال العيال طالعة كده ليه

يالا ماااعلينا

و كل سنة و انت طيب

 
At 7:38 ص, Anonymous غير معرف said...

wallahi enta esloobak hayel...

Kol sana wenta tayeb...!
insha2allah elsana elgaya te7faz esm dawa tany 3ashan yeb2o etneen..taghyeer ya3ni..!

 
At 12:57 م, Anonymous غير معرف said...

that was very funny..you laughed the shit out of me

 
At 8:57 م, Anonymous غير معرف said...

welcome back for logging in problems i couldnot sign in so i wrote as anonymous

great post

maf2ou3a

 
At 10:40 م, Anonymous غير معرف said...

كل عام وانت بخير
واهلا بعودتك الى عالم المدونات
تعليقاتك تدل على نظره ثاقبه و مراقبه جيده للحياه
وانت فعلا متميز في موضوع الفواصل فخير الكلام ما قل ودل

 
At 10:41 م, Blogger still breathing said...

يعني ايه كل سنة و انت راس؟

 
At 2:20 ص, Blogger Mohammed Sameer said...

يا راجل ؟ و انا اللى افتكرت وائل مكتئب من الشغل!!!

 
At 12:16 م, Anonymous غير معرف said...

كل سنة و انت طيب

 
At 4:07 م, Blogger ذو النون المصري said...

كل سنه و انت طيب
و عيد سعيد للجميع

 
At 9:00 م, Blogger بعدك على بالى said...

كل سنة وانت طيب وانت بخير وانت سعيد وانت ناجح و ...... محقق كل احلامك


بخصوص ملحوظتك علم وحينفذ يادكتور

تحياتى

 
At 11:43 ص, Anonymous daktara said...

wa7ashtena moot
mabrook el-neyaba

mabetfakkarsh tesaafer 7atta ba3d el-majesteir??

 
At 6:38 م, Blogger Pianist said...

حرام عليك مندوبين الادوية يا عم
انا علي فكرة باكره النواب
بيبقوا معاويج
معلش يعني انا كنت بعاني اصلي معاهم

 
At 8:36 م, Anonymous غير معرف said...

امال بقى لو كانت ليلة القدر .. و بقيت مساعد اخصائى . ,ولا اخصائى .. ولا استشارى يابنى .. ده مرتبك حايزيد .. يجى........ 20 جنيه ..
و حنخاف عليك .. من الاسراف ...
مرحبا بك .. فى مجاهل وزارة الصحة .. الى أن يمن الله عليك .. باى حاجة تانية بره مصر ..
تحياتى

 
At 8:23 م, Anonymous wuthering said...

طيب
ضحكت اول مرة السنة دى
ابسط ياعم اول مرة رجلى تعتب بلوجك واضحك بجد من قلبى اول مرة السنة دى
كل عام وانتم بخير
ومترقيين كده

 
At 6:01 م, Blogger ROMIL said...

صباح الراس

ايه الكلام الجامد ده
وصاحبك اللى انت بدلت اسمه انت شردته اكتر من تشريدة صدام حسين

ROMIL

 
At 3:39 م, Blogger moony said...

ما تقلنا المسمط وعربيه رفعت دول فين بالظبط اهوا الواحد يجدد الواحد زهق من عربيه المهندسين

 
At 6:32 م, Blogger shabfa2re said...

كلام لظيــظ
وكل سنة وانت طيب
D:

 
At 3:40 م, Anonymous AboHmaid said...

لما عرفت البلوج بتاعك كنت متوقع انى الاقى بلوج صغير ( انا مليش فى البلوجز و مش متابع بصراحة) و قلت اتفرج، بصرا حة انا فوجئت و قعدت اقرا و أقرا لغاية ما خلصته.

جه فى بالى سؤال؟ ليه دايما الدكاترة عندهم موهبة فى الكتابة! يوسف ادريس و علاء الأسوانى و احمد خالد توفيق (بتاع ما وراء الطبيعة ود. رفعت اسماعيل) يمكن عشان هم تعاملهم مع الناس من كل صنف و من كل طبقة. يمكن عشان بيشوفوا الناس و هم متألمين و بيصوتوا مهما كانوا أقويا. يمكن عشان مشهد المو ت بقة شىء روتينى يومى. و مش عارف ليه كلهم بيقعدوا يشتموا فى عياداتهم (يوسف ادريس كان ييقعد نص الرواية يوصف فى الوحدة الصحية و الدهان المقشر على الحيطان) و جه فى بالى لو كان لى بلوج مهندس كمبيوتر زيى يكتب فى ايه!! مش عارف!! اللى جه فى بالى حالا انى اكتب عن اشارة مصطفى محمود واللى الأشارجى مصر انه يفتحها و هى حمرا و يقفلها و هى خضرا كتعبير عن الغباء فى بلدنا او عن صفحة اخبار الدولة فى الاهرام اللى كل يوم بالاقيها مليانة اخبار تشل عن زيادة الاجور 30 جنيه و بناء 530 مدرسة ملهومش لزمة و مليانة صور عواجيز بكرافتات و عيونهم تنطق بالبلاهة المفروض انهم دول اللى ماسكين بلدنا.

اسلوبك فكرنى بأسلوب يوسف معاطى (دى مصالح الدولة العليا! ومين ياخد باله من مصالحى انا السفلى!). حرام انك تيأس من كتابة مقال (ليه رأس و لا مؤاخذة وسط و رجلين) أو ممكن تجرب رواية أو قصص قصيرة يمكن ربنا يفرجها و تبقى كاتب مشهور و تعرف تجيب ال 128 ام تكييف

على فكرة فى اسلوب ظريف يرحمك من الكتابة فى البلوج. اكتب فى وورد و copyو pasteبعد كده فى البلوج (دى فايدة انى مهندس كمبيوتر)

افتكرت سمعت عن اياكش تولع منين. الدستور او صوت الامة كانوا عاملين مقال عن أشهر البلوجيرز و ساعتها لفت نظرى الاسم. هاحاول الاقى العدد!

هاحط البلوج بتاعك مع الحاجات اللى باقراها كل يوم فى الشغل (اسلام اونلاين و المصرى اليوم والى يتنجح انها تنكد على كل يوم )

ياللا سلام

 
At 6:00 م, Blogger Dr. Tantawy said...

بصراحه انا داخل على مرحله عبده امتياز

white causeless useless hyperactive organism

وانت بشرتني جدا بيها و طمنتني على مستقبلي
شكلي هاخد جلديه و اجي اقعد معاك نونس بعض
و نديها تينيااااات طول النهار :))

 
At 9:39 ص, Blogger ادم المصري said...

كل سنه وانت طيبب يا دكتور

الرغم انها متاخرة


بس معلشي


ملحوقة

 
At 6:46 م, Blogger هوميروس said...

مساء الخير وكل سنه وانت طيب
اوعي تغلب المناديب هم هيلاقوها منك ولا من الشركة
وابقي سلم لي علي صاحبك بتاع البوس ده

 
At 11:35 ص, Blogger Memo said...

دي كانت سنه منيله بستين نيله و اطران و هباب و زفت و خلصت الشتايم
و كل سنة و انت طيب

 
At 12:57 ص, Blogger kaed said...

ياة و اخيرا الواحد عتر فى دكتور يعرف يتفاهم معاه إنت يابنى لسة نائب جديد لما تبق قديم زى حالاتى حتعرف الخيبة القوية و سلام بقى دلوقتى عشان عندى سبوبة .... عيان فى السريع يعنى

 
At 3:49 ص, Blogger ahmEd_H said...

دمك خفيف يا مضروب
متعرفش مين اللى ضربك بس اهو اى كلام فى الاوهام
دا احلى بوست شوفتوا على السنة اللى ماتت

 
At 4:01 م, Blogger غادة الكاميليا said...

طب والله ليك وحشه
كل سنه وانت طيب ياعم الكبير

 
At 2:39 م, Blogger film69 said...

الله يجازيك يا دكتور
بقالي يومين مضحكتش
كل سنة وأنت طيب
وبلغ مهاد تحياتي وقله ميزعلش :))

 
At 12:26 ص, Blogger الوردة السوداء said...

هههههههههههههههه

ولله مانا عارفة بضحك على ايه
بس ضحكتنى اوى حكاية النايب والبتاع دى

الدنيا حلوة ياعم
مش اوى كدة

 
At 11:23 ص, Blogger spellz said...

Haha enta mas5ara:D "kol sana wnta tyeb"

Seme3t enohom zawedo el moratabat bta3et betoo3 emteyaz mn 120 l 300 da sa7ee7?

Asl ta2dirati lhmdllh matwadeneesh fe ay 7etta:D

3muman ana ha5od Derma b3d l agaza... ma frnds says it sux "rabna m3ak"

Yalla 3o2bal mashoofak ostaz kber ad L donya te3a2ad l 3eyall w ysamook malignant kda :D

Anyways am realyy happy to see a Dr with such sense of humour Keep on good working mate

 
At 8:22 م, Blogger Memo said...

يا ترى انت فين يا مرزووووووووووووووووووووق
المنادي رجع عالحمار مبقوق

 
At 10:24 ص, Blogger إياكش تولع said...

فى البداية أود الاعتذار مسبقا عن وجود بعض الاخطاء فى الردود و ذلك لاستعمالى النسخة الجديدة من البلوجسبوت و الذى قلب لى أسماء نصف المعلقين الى انونيموس و النصف الاخر الى اللغة المسمارية

-:ماعلينا

انا اهه يا ستى....أنا بتاع الحساسية
:))))





أنونيموس

انا حفظت 3 زيادة الشهر اللى فات،بس برده باكتب الاولانى....العشرة ماتهمونش الا على ولاد الحرام

أنونيموس

شكرا على مرورك


-:مفقوعة

منورة البلوج كله


-:واحد من الناس

شكرا على تعليقك اللطيف،و كل سنة و انت طيب


-:ستل بريذنج

أهلاااااا
مش ناوية تغيرى البلوج بتاعك و ترجعى للقديم!!!!


-:أبو سمرة

لا ياخويا،دة هارى نفسه false visits و مروق نفسه فى الشغل

!!!من يوم ما زرع و ماحدش قادر يكلمه


ذو النون

أهلا بيك فى المدونة و كل سنة و انت طيب



العزيزة بعدك على بالى

انتى مابتجيش ليه....مش تبقى تيجى
كل سنة و انتى طيبة


دكترة

الله يبارك فيك
طبعا بافكر...بس هوة فين الماجيستير الأول:)


بيانيست

دة احنا غلابة،بتوع الادوية همة اللى واكلينها والعة


أنونيموس

الله يبشرك....شكرا على المرور و جرعة التفاؤل بتاعتك



wuthering

كل سنة و انتى طيبة و بتضحكى على طول


-:روميل

انا عملت حاجة....مانا شلت اسمه اهه


-:مونى

شوفى يا ستى.....المسمط فى أول شارع السد فى السيدة زينب ،اما العربية ففى شارع جانبى من جنب حلوانى العبد بتاع طلعت حرب....بالهنا و الشفا:)


شاب فقرى

دة انت اللى لظيظ
:))


-:أبو حميد

لينا قعدة لما أشوفك......بس انت نورت البلوج
أما بخصوص موضوع الوورد ففشل معايا برضه:(


د.عبده طنطاوى

تعال ياخويا....خد انت بس امتيازك فى المستشفى بتاعتى و انا حاضبطك

طول عمرى بادعى ان ربنا يحطلى واحد امتياز تحت إيدى


ادم المصرى

و انت طيب يا زعيم


هوميروس

ما يصعبش عليك غالى ،يا عم دول بياخدوا على قلبهم اد كدة....جتنا نيلة فى حظنا الهباب



ميمووووو

و انتى طيبة و انشاءالله السنة الجاية مايكونش فيها كل الهباب اللى انتى قلتيه دة


kaed

منورنا
عالعموم الخيبة واحدة



أحمد

الله يكرمك....شكرا عالمرور


غادة الكاميليا

يعنى لازم نقولك واحشانا عشان تعدى؟



-:فيلم

كل سنة و انت طيب....تصدق انه زعلان!!!


الوردة السودا

نورتينا


-:spells

إزيك يا دكترة....دة انتى تنورى الجلدية
أما بخصوص المرتبات دى فأنا ماعرفش....بس يعنى حتاخدو انتو 300 و احنا 250؟؟؟
دى تبقى هزلت


ميموووو تانى

انا هه....مارضتش أكسر بخاطر الحمار
:)

 
At 1:00 ص, Anonymous غير معرف said...

begad merci 3ala el post el gamed ana 3omry mad7ekt fi 7yaty ad keda rabena yebreklak

 
At 12:49 م, Blogger yousef said...

كل سنة وأنت على .....يا ريس
مقالتك جامده بجد
وعلى رايك ياكش تولع

 
At 1:52 ص, Blogger DR.SHERBO said...

الاخ الزميل نائب الجلدية


دا مش ريكويست
دا بس انا حابب امسيو اهنيك على المرور بكل هذه المراحل

أنا لسة في أول يوم تكليف و بفكر استقيل بعد ما التقينا بوكيل الوزارة و فهمنا الدنيا ماشية ازاي

 
At 3:29 م, Blogger Shiko said...

بقى ده كلام
انت حالتك ميؤس منها ومتسألنيش ده معناه ايه الدكاترة فى الافلام بيقولوا كده
وعلى رأى واحد زميل كله هيطلع فى الغسيل
ملحوظه
اول زيارة ليا مدونتك كميله

 
At 11:11 ص, Anonymous سحابة said...

ربنا يسعدك يارب :>:>

المداومة على قراءة مدونتك تمنع الاكتئاب نوهائيًا...

ابقى اكتبها في الروشتات للعيانين :>

 
At 12:22 ص, Anonymous د/اجدع بنوته said...

لا لا لا ده حضرتك بجد مشكله بحته انا بتهيألى الشارع كلو سمع ضحكى يعنى .. حد طايل نيابة جلديه ادعيلنا انت بس نطلع بنيابة ان شالله سيكتريك اصل الواحد شكلو هيرسى ف الاخر ع نايب فحص قاع العين وتبقى نايبه سوداا والله .. انا شكلى كده مطوله هنا ومش همشى الا اما اخلص كل البوستات

نزلى بقى واحد رز بلبن هنا .. ورينا حسن الضيافه

 
At 3:30 ص, Anonymous غير معرف said...

Μy brother геcоmmеnded
I might liκe thiѕ website. He ωas entirеly right.
This post aсtually made my ԁaу.
You can not imagine just how much time I had spent
for this infο! Τhanks!

Havе a look at my web blog: payday loans

 

إرسال تعليق

Links to this post:

إنشاء رابط

<< Home