حوارات
سواق التاكسى: سمعت يا بيه عن اشاعة ان الريس بيودع؟؟
أنا: آه سمعت
السواق:و لا مؤاخذة ايه رأى حضرتك.....أصل أنا احب اتكلم فى السياسة و افهم فيها اكتر من أيتها سواق عندنا فى الموقف
أنا: اسم الكريم ايه الأول؟
السواق: محسوبك محمود و بيقولولى يا حودة
أنا: بص يا حودة...أنا ماعرفش، لكن بيقولوا انه فعلا عيان
حودة: عفارم عليك يا واد يا حودة يا جن، أنا برضه قلت كدة......الجدع بقاله مدة لا بيطلع فى تلفزيون و لا فى راديو، و من مدة و هوة وشه مخطوف و صحته فى النازل....أكيد عيان خصوصا ان انا سمعت ان عنده-ربنا يعافينا -المرض الوحش
أنا: مرض ايه يا حودة؟
حودة: مرض البربور يا بيه!!!! أصل انا كنت راكب من يومين مع زبون محترم و طلع دكتور، و قاللى ان عنده معلومات مؤكدة ان الريس عنده المرض دة (غالبا قصده على البرى برى،واضح انه كان راكب مع سباك!!)......ياللا ربنا ياخده مطرح ماهو قاعد
أنا (قلت أستهبل شوية): بس بيقولك انه احتمال يكون مات
السواق: تصدق بإيه يا بيه إن أنا برضه قلت كدة و ان دة رأيى من الأول!!!....واحد زبون زيك كدة اخر وجاهة طلع دكتور برضه و قاللى انه عنده معلومات مستوثأة (شفت مستوثأه دى!!!) انه ميت بقاله اسبوع و الحكومة مكتمة عالخبر ،ماهى حكومة بنت حرام و مادام عارفة الاشاعة اللى دايرة فى البلد و مع ذلك مسكتمة و مبكتمة (جديدة دى!) اعرف انها اكيد مرقدة على حاجة
أنا: و تفتكر يا حودة هوة مات ازاى؟
حودة: أكيد البربور يا بيه!!!!حاكم دة مرض صعب قوى، ساعة ما يكلبش -اسم الله على مقامك- فى المخاصى و العياذ بالله قول البنى ادم يا رحمن يا رحيم....ياللا ماتجوزش عليه غير الرحمة
أنا (لقيت الموضوع مسلى): بس أنا بقى سمعت غير كدة خالص يا حودة، بيقولك إن الريس فل الفل و إن اللى مطلع الاشاعة دى حبة عالم.......
حودة (مقاطعا فى حماسة): أنا برضه قلت كدة يا بيه مافيش غيرهم، محسوبك مش داقق عصافير و تقريبا انا اكتر واحد يفهم سياسة فى الموقف عندنا، واحد زبون ابن ناس كدة قاللى انه شغال فى الخارجية و عنده اخبار بإن الامريكان و اليهود ولاد ال(....) همةاللى بيطلعوا الطرطشة دى، أمال إيه يا بيه....كل الحئد دة عشان عارفين احنا قد ايه فى مصر بنحب الريس، و متغاظين مننا اكمننا انتخبناه خمس مرات لكن الريس بتاعهم يادوبك بيقعد اربع سنين و بعد كدة يرموه رمية الكلاب!!!!تصدق يا بيه و حياة من خلانى آجى مدينة نصر عشان اخدك و هية مش سكتى....انا اليوم اللى الريس وقع فيه فى مجلس الشعب كان عندى شرقة من صباحية ديك النهار،و لما ربنا خد بيده انا وزعتله شربات فى الموقف كله......ربنا يخليهولنا و يحفظه يا رب
أنا:......
حودة: ساكت ليه يا بيه.....بذمتك مش بافهم فى السياسة و انفع اروح أحلل فى التلفزيون
أنا: هوة بعد الكلام اللى انت قلته دة ما تسكتش على نفسك يا حودة،أكيد لازم تروح تحلل....إلا انت مين اللى فهمك سياسة (....أم اللى فهمهالك) يا حودة؟
حودة: أبويا يا بيه ربنا يخلليه
أنا: و الحاج بيشتغل ايه بقى؟
!!!!!!حودة: مزين يا باشا
!!!!أنا: أنا برضه قلت كدة
حوار برئ مع ابن واحدة زميلتى عنده خمس سنين أمه بلتنى بيه لحد أما تطلع من السوبرماركت
الولد : عمو عمو ...انت اسمك ايه
انا: محمد، وانت؟؟؟
الولد: شادى...ممكن اتكلم معاك شوية عشان ماما مش بترضى تتكلم معايا فى أى حاجة
انا:ماشى يا حبيبى
شادى:هوة انا جيت ازاى (سؤال الأطفال الخالد خلود البلهارسيا فى كبد الانسان المصرى)
انا: بعد أما ابوك و امك اتجوزوا ....المأذون راح اشتراك من السوبرماركت
شادى: يعنى ماما دلوقتى و هية طالعة حتجيب واحد زيى
أنا: والله يابنى حسب صحة الناس اللى جوة....بس الصراحة أمك تجيب
شادى: آخر مرة لما سألتها كدة قالتلى اقعد ساكت يا حمار....أنا حمار ياعمو؟
أنا: يجوز يابنى
شادى: هوة ايه الفرق بين الحمار و البغل يا عمو؟؟؟
أنا (ايه الواد الحقنة دة!!): الحمار و الحمارة لما بيتجوزوا بيخلفوا حمار، لكن لو الحمارة نامت مع حمار مش جوزها بيجيبوا بغل (هع هع هع)
شادى: همة الحمير بيتجوزوا زينا يا عمو؟
!!!!أنا: يابنى...أصلا ماحدش بيتجوز غير الحمير
شادى: أنا باشوف الحمار فى الشارع، لكن لما رحت جنينة الحيوانات شفت القرد
أنا (متوقع السؤال الجاى على سيرة القرد): طيب
شادى: هوة ليه القرد من ورا أحمر يا عمو؟
أنا: عشان عنده تسلخات
شادى: بابا من يومين قال لماما تجيبله مرهم التسلخات....هوة كمان من ورا احمر؟
أنا: والله مادام اتجوز امك تبقى غالبا.....حمرا
شادى: طب عشان مايجيلناش تسلخات....ينفع أحطه عليا و على ماما ؟؟
!!!!!!!أنا: عليك و على أمك و على أبوك فى ساعة واحدة.....غور ياااد
حوار فى العيادة الخصوصى مع واحد -اللهم احفظنا- مابيعرفش
أنا: وحد الله فى قلبك ياسطى نبيل الموضوع مش مستاهل
نبيل: لا يا بيه كله الا الكرامة، خلاص الكيل فاض و التنك عبى (!!!)....أنا لازم أقتلها
أنا: مانت كنت كويس المرة اللى فاتت
نبيل: لما الفواجرا و الفيتامين ماجابوش همهم استعوضنا ربنا....إنما هوة الصخص ايه إلا نفسية
أنا: هية قالتلك حاجة؟
نبيل: همة النسوان كدة يا دكتور، مايصدقوا ان الراجل يخستع شوية و تلاقى حيلهم اتصلب و حنكهم دة ابتدى يطلع هبو بعيد عنك
أنا:خير؟
نبيل: الولية بنت الصرمة ضربت بمشاعرى عرض الحائط (مش فاهم انا ايه كهربائى السنسيون دة اللى يعرف عرض الحائط!!) و بعد 3 سنين جواز و اربع عيال بتدلعنى على آخر الزمن
أنا: يا سلاااااام....هوة حد لاقى دلع يا نبيل؟
نبيل: يا بيه مانت مش لاقط، بنت الكلب بتقوللى يا بلبل...........!!!!هارش؟
أنا: هارش
نبيل: طول النهار تعال يا بلبل، روح يا بلبل ، انت لسة نايم يا بلبل؟؟؟....تخيل بتقوللى كدة و انا زى الشحط طويل عريض (عريض عرض الحائط:))
أنا:تاهت و لقيناها ياسطى بلب...نبيل، يا إمتن تتجوز غيرها ، يا إمتن تغير اسمك
نبيل: النهاردة بتقوللى هاتلى عيش معاك و لما سألتها عيش ايه ، راحت ضحكت و قالت :أكيد مش فينو يا بلبولتى
أنا: قالتلك يا بلبولتى؟؟؟؟
نبيل: اااااااااااااه....مش عارف دى اعمل فيها ايه يا بيه، أنا حاطلع من عندك دلوقتى و انزل ادور فيها الضرب
أنا: اضربها يا بلبل....اضرب بيها عرض الحائط
posted by هراءات منطقية @ ٤:٥٣ م
16 comments
16 Comments:
جامدة مووووووووووووووووووووووووووت يا حبي
الى الامام دائما و بالتوفيق
بس ياريت ماتتأخرش تاني علينا
MOHAD
Hi it is the first time to read ur thoughts but I think that I like it very much as you let me laugh from my deep heart. I have one question: Can you meet that child (shadi) again but in this time let his mother enter the market and give me the adress of that market to bring another brother for shadi Ha Ha Ha Ha.
Wael
حمدا لله عالسلامة يا دكتور
وحشتنا جدا
معلم واحشني موت
التدوين من غيرك مالوش معني
انا عايز اكتبلك كومنت بعرض الحائط
وبعدين دول مش بوست واحد ولا بوستان انهم ثلاث بوسات اقصد بوستات
بس تسلم
تخيل انت لما يكون سواق تاكسي وابوه مزين يعمل ايه بقي عايز اضيفك ع الفيس بوك ياريس بس ايميلك مش عندي
ده ايميلي ياريت تضيفني
alafrit_abdo@yahoo.com
أنت فين يا راجل. بقالك سنة مابعتش حاجة لدرجة أني قلت أنك بطلت تدوين. و النهاردة ببص في الFavorites قلت أشوف يمكن يكون رجع.
بوست خطير. و ياريت ما تغيبش علينا تاني.
على فكرة أنا قرأت كل مدوناتك و متابعك من زمان بس أول مرة أبعت رد.
بص يا عم د ياول زيارة لكنها ان شاء الله مش الأخيرة
انا من ساعة ماقرأت مابطلتش ضحك
فل عليك بجد
- ومقدر حالة نبيل دة 4 عيال في 3 سنين الراجل كان شغال ما بياخدش راحة
بس هي الولية مراته عندها رقت او رغبة في وسط زحمة العيال دي انها تسلم على بلبل
غريب امر النسوان يا جدع
شيئ اخير اختلف معك فيه ان حسني مبارك مهما طال عمره سيموت ( اوبشن البني ادمين كدة وانت اكيد سيد العارفين )
لكن الزمالك لن يموت شوف كام رئيس جم وراحو وهو عايش المريض مهما طال مرضه هيخف ان شاء الله
تحياتي ليك يا جميل ودمت بخير
بص بقى انت خليتنى فرجت عليا الناس من الضحك خصوصا شادى ده اان لو مكانك كنت لعبت بيه كورة
حمدالله على السلامة أنت فين ياراجل من زمان
كالعادة راجع بصاروخ أجمد من ام شادي
تحياتي
ROMIL
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
يخرب بيت فقر سيادتك
مجموعة حوارات غيرت الموود والله يا بيه
تحياتي
مبدايا نورت البلوجر كلة والنت وعالم التدوين وحشتنا جدا جدا جدااااااااااااا حمد اللة عالسلامة
لا وراجع مش فاضى دة انت معبى عالاخر اية يابنى الحلاوة دى 3 بوستات مرة واحدة والتلاتة احلى من بعض
ةبالمناسبة انا (لميس)مش ياسمين ;)
كنت فين يا راجل وحشتنا جدا جدا
عموما الف حمدلله على السلامة و ما تغيبش علينا تانى
بوست اكتر من رائع احييك عليه
إنت رااااااااااااااائع
هههههههههههههههههههههههههه
حلوة جدا بجد.. اخر حاجة
عجبتني جدا بتاعة السواق والواد الصغير
بس ليه مافيش بوستات جديدة
خسااااااااارة بجد
انت قليل الكتابة بس لما بتكتب بتدي في العضل علاطووووووووووووووول
100 - 100
بتفكرني بـ د.احمد خالد توفيق
أنا ازاى مجيتش هنا من زمان
جامد جدا يعنى
حمدا لله على السلامة
إرسال تعليق
<< Home