زمبوء
انطلاقا من الحقيقة العلمية و الحتمية التاريخية القائلة بأن(عدوك ابن كارك).....قام الأخ فهرنهايت بفقعى زمبوءا(و بالفصحى زمبوقا) من العيار التقيل لما زنقنى بالتاج بتاع (امتى تحس انك بتحب الدنيا).....مممممم....ماشى يا يا زعيم
:-إمتى باحب الدنيا ، إمتى يا واد يا محمد ، إمتى إمتى؟...........آه،خد يا سيدى
لما أكون مستلف عربية أبويا و أكون ماشى بيها فى الشارع و أقف عشان أعدى أى حد ماشى فيشاورلى بإيده شاكرا
لما أى عيان يدعيلى
لما أدخل البلوج بتاعى و ألاقى حد معبرنى بتعليق أو كلمة مديح.....و باكرهها جدا لماتطلعcomment deleted
لما أسمع أى تواشيح ساعة الفجرية
لما دكتورة امتياز أصغر منى بسنة تقوللى(حضرتك).....الاحترام حلو برضه
لما أمشى فى شارع فاضى الساعة 7 الصبح فى شهر يناير
لما أحد المنتديات طلب منى إنى أكون ضيفه فى لقائه الدورى الشهرى.....ما تفهمونيش غلط
لما بييجى فيلم الكيت كات فى التليفزيون
:-لما أتفرج على المشهد دة
ماهواللى بتشربه دة عشيش
حشيش؟
آه عشييييييييييييييييييييييييييييش
يا سعاد أنا شربت حشيش يا سعاد
لما أصحى نص الليل فى ليلة ساقعة عشان مزنوق و بعد أما أخلص أغسل إيدى بمية ساقعة و أرجع تانى تحت الغطا
لما أقرا رواية نقطة نور لبهاء طاهر
لما آكل سندوتش بطاطس صوابع طحينة بس من غير سلطة من عند البرنس
لما أسمع صوتها
لما أقعد أنا و نهى نغلس على مهاد خصوصا على الموضوع إياه.....واخد بالك ياد؟
(لما باسمع (أنا قلبى مساكن شعبية) و (أنا لحبيبى
لما أحس إن أبويا و أمى راضيين عنى
لما ألاقى واحد لا أعرفه و لا عمرى زرت البلوج بتاعه ضايفنى عنده
لما قابلت سعيد شعيب فى المترو ،و لما قابلت محمد بدرالدين فى المعرض
لما تامر حسنى اتقبض عليه
لما يبقى عندى نباتشية طويلة و مملة بس عارف إنى لما حاروح البيت حالاقيهم عاملين مكرونة و فراخ
لما باقعد على قهوة ليالينا فى شارع البورصة فى وسط البلد فى ليلة شتوية و انا باكتشف روعة العلاقة التبادلية بين الشاى الكشرى و المخلل(شفطة من الشاى وراها حتة مخلل،و هكذا دواليك).......و حاحبها أكثرلما أعرف أصل كلمة دواليك دى جه من أنهى داهية
لما أقرا رواية لخيرى شلبى أو الغيطانى أو القعيد
لما أسمع قصيد لنجم بصوته
(لما عبدالحليم على يضيع جون(مع إنى زملكاوى
لما مناخيرى تاكلنى و أهرش فيها
لما دخلت فيلم دم الغزال
(لما شفت منير و صلاح السعدنى فى مسرحية (الملك هوة الملك
لما البوست بتاعى اتنشر فى الدستور
كفاية كدة يا ريس و لا عايز كمان؟؟
:-أزمبأ مين.....أزمبأ مين.....أزمبأ مين؟.................آه
هوميروس
posted by هراءات منطقية @ ٩:٥٥ م
33 comments
